نائجیریا کے اسکول کی عمارت گرنے سے 100 لوگ دب گئے، 22 طلبا کی ہلاکت کی تصدیق

ابوجا: شمالی وسطی نائیجیریا میں دو منزلہ اسکول کی عمارت گرنے سے 100 افراد دب گئے۔ کم از کم 22 طلبا کی موت ہو گئی اور 132 دیگر زخمی ہو گئے۔ یہ جانکاری افسران نے دی ہے۔ جوس شہر کے ایک پرائمری اور سیکنڈری اسکول کی نجی ملکیت والی سینٹ اکیڈمی کی عمارت اس وقت گر گئی جب طلباء جمعہ کی صبح پروموشنل امتحان دے رہے تھے۔ اس عمارت میں کئی کلاس رومز اور دفاتر تھے۔

یہ حادثہ شمالی وسطی نائجیریا میں جمعہ کی صبح اس وقت پیش آیا جب بچے کلاس میں تھے۔ حادثے کے بعد بچاؤ ٹیم کو ملبے تلے دبے 100 سے زائد افراد کو نکالنے کے لیے سخت جدوجہد کرنا پڑی۔ جس وقت یہ حادثہ ہوا اس وقت طلباء اسکول پہنچے ہی تھے کہ عمارت گر گئی۔

کمشنر موسی اشومس نے کہا کہ امدادی ٹیموں نے جمعہ کی شام تک ملبے سے کل 154 افراد کو نکال لیا ہے، جن میں 22 لاشیں اور 132 افراد شامل ہیں، جن میں سے چھ کی حالت تشویشناک ہے۔

گورنر کالیب متافوانگ نے اس واقعہ پر دکھ ظاہر کرتے ہوئے ریاست کے لیے ایک بہت بڑا نقصان قرار دیا اور ہنگامی خدمات پر زور دیا کہ وہ ملبے کو تلاش کر کے متاثرین کو بچائیں۔ ریاستی حکومت نے اس سانحہ کے لیے اسکول کے کمزور ڈھانچے اور دریا کے کنارے اس کے مقام کو ذمہ دار ٹھہرایا۔

نائیجیریا کی نیشنل ایمرجنسی مینجمنٹ ایجنسی یا نیما نے سوشل میڈیا پلیٹ فارم ایکس پر لکھا ہے کہ ’’ہلاکتوں کی صحیح تعداد کی تصدیق کی جا رہی ہے۔ اب تک ملبے تلے دبے 40 بچوں کو بچا کر ہسپتال بھیجا جا چکا ہے۔‘‘