کورونا وائرس: ’آئبو پروفین‘ کی جگہ ’پیرا سیٹامول‘ استعمال کریں... عالمی ادارہ صحت

جنیوا: عالمی ادارہ صحت کے ترجمان کرسچین لینڈ میئر نے پریس کے نمائندوں سے گفتگو کرتے ہوئے عوام الناس کو مشورہ دیا ہے کہ جو لوگ نوول کورونا وائرس (کووڈ-19) سے متاثر ہیں انہیں چاہیے کہ درد کی صورت میں’ آئبو پروفین‘ کی جگہ پیراسیٹامول کا استعمال کریں۔

ان کا کہنا تھا کہ آئبو پروفین ممکنہ طور پر نوول کورونا وائرس کے مضر اثرات کو شدید تر کرسکتی ہے۔عالمی ادارہ صحت کی جانب سے یہ مشورہ معتبر طبی تحقیقی جریدہ- ’دی لینسٹ ریسپائریٹری میڈیسن‘ کے شمارے میں آن لائن شائع ہونے والی ایک تحقیقی رپورٹ کی بنیاد پر دیا جارہا ہے۔

یہ تحقیق چین میں کورونا وائرس سے شدید طور پر متاثر، سینکڑوں مریضوں کے اسٹڈی پر مبنی ہے جو پہلے ہی ذیابیطس یا دل و دماغ کی کسی بیماری میں مبتلا تھے اور درد کے علاج کے لئے دیگر مختلف دوائیں استعمال کر رہے تھے، ان مریضوں کی اسٹڈی پر یہ امکان سامنے آیا ہے کہ آئبو پروفین اور اسی طرح کی دوسری درد کش ادویات ایک ایسے خامرے (انزائم) کی پیداوار میں اضافے کا باعث بنتی ہیں جو کورونا وائرس کی اثر پذیری کو بڑھاوا دے کر اس کے اثرات شدید تر کر دیتا ہے۔

اگرچہ یہ امکان ابھی صرف مفروضہ کی صورت میں ہے لیکن اس بارے میں مناسب شہادتیں مدنظر رکھتے ہوئے عالمی ادارہ صحت نے عام لوگوں کو خبردار کیا ہے کہ اگر وہ کورونا وائرس کی وجہ سے بیمار ہیں اور ساتھ ہی ساتھ انہیں جسمانی درد کی شکایت بھی ہے تو بہتر ہے کہ وہ صرف پیراسیٹامول پر گزارا کریں اور اپنے ڈاکٹر کے مشورے پر ہی آئبو پروفین کا استعمال کریں۔