کشی نگر: کورونا وائرس کے پیش نظر غیر ملکی سیاحوں کی طبی جانچ شروع

کشی نگر: اترپردیش کے ضلع کشی نگر میں کورونا وائرس سے تحفظ کے لئے ضلع انتظامیہ نے احتیاطی تدبیر کے طور پر یہاں تشریف لائے بیرونی سیاحوں کی صحت کی جانچ مہم شروع کر دی ہے۔

آفیشیل ذرائع نے سنیچر کو یہاں بتایا کہ کووڈ۔19 سے تحفظ کے لئے ضلع اور صحت انتظامیہ نے کمر کس لی ہے۔ اضافی مستعدی کا مظاہرہ کرتے ہوئے سیاحتی مقام کے 10 معروف ہوٹلوں میں قیام پذیر اور مندر احاطے میں گھومنے والے ملکی۔بیرونی 500 سیاحوں کے صحت کی جانچ کی گئی۔ ہوٹلوں میں سیلف رپورٹ فارم بھی تقسیم کیے گئے ہیں۔ جس میں سیاح کو اپنے بارے میں اطلاع فراہم کرنی ہے۔

ضلع ملیریا افسر ڈاکٹر ایس این پانڈے کی قیادت میں صحت ٹیم ہوٹل انپیرئل پہنچی اور ہوٹل منیجر کو حکومت کی طرف سے جاری سیلف رپورٹنگ فارم دیا۔ جانچ ٹیم نے موجود سیاحوں اور دیگر افراد کی جانچ بھی کی۔ علاوہ ازیں ہوٹل لوٹس، ہوٹل اوم ریزیڈنسی سمیت دیگر ہوٹلوں میں بھی سیلف رپورٹنگ فارم تقسیم کر کے معلومات طلب کی گئی ہیں۔ فارم کے ذریعہ ہوٹل میں آنے والے سیاحوں کی ذاتی معلومات طلب کی گئی ہے۔

رپورٹنگ فارم میں سیاح کا نام، فلائٹ نمبر، سیٹ نمبر، پاسپورٹ نمبر، پہنچنے کی تاریخ، سفر کے آغاز کی تاریخ، آخری سفر کی تاریخ کے بارے میں پوچھا گیا ہے۔ ساتھ ہی بخار، کف، اور سانس لینے میں تکلیف کے متعلق جانکاری طلب کی گئی ہے۔ وہیں ملکی سیاحوں سے ان کے مکان نمبر، محلہ یا گاؤں کا نام، تحصیل، ضلع، شہر، ریاست، پن کوڈ، موبائل نمبر، ای میل، آئی ڈی وغیرہ کی معلومات فراہم کرنے کو کہا گیا ہے۔