خوشخبری! برطانیہ میں 2 کورونا ویکسین کو ملی منظوری، آئندہ ہفتہ سے ہوگی ٹیکہ کاری

کورونا بحران کی وجہ سے پوری دنیا پریشان ہے اور کورونا ویکسین کا ٹرائل کئی ممالک میں جاری ہے۔ لیکن اس درمیان برطانیہ سے ایک بڑی خبر سامنے آ رہی ہے جہاں ایک نہیں بلکہ دو کورونا ویکسین کو منظوری مل گئی ہے۔ میڈیا ذرائع سے موصول ہو رہی خبروں کے مطابق ’فائزر‘ اور ’پایونٹیک‘ کورونا ویکسین کو اس ملک میں منظوری ملی ہے اور برطانیہ ان دونوں ویکسین کو منظوری دینے والا پہلا مغربی ملک بن گیا ہے۔ یہاں قابل ذکر ہے کہ امریکہ اور یوروپی یونین نے ابھی تک ان ویکسینز کو منظوری نہیں دی ہے۔ برطانیہ میں یہ ویکسین اگلے ہفتے سے دستیاب ہوگا۔

واضح رہے کہ کچھ دن قبل ہی فائزر کمپنی نے اعلان کیا تھا کہ وہ لیب میں کووڈ-19 یعنی کورونا کی ایسی ویکسین بنانے میں کامیاب ہوئی ہے جو کہ وائرس کے سامنے 96 فیصد اثردار ہے۔ کل ہی جرمنی کی بایوفارماسیوٹیکل کمپنی بایواینٹیک اور اس کی امریکی شراکت دار فائزر نے یوروپی یونین کے سامنے ویکسین رجسٹریشن کے لیے رسمی درخواست دی تھی جسے برطانیہ حکومت نے منظور کر لیا ہے۔ اب اگلے ہفتے سے برطانیہ میں یہ ویکسین دستیاب ہوگا۔

غور طلب ہے کہ دنیا میں کورونا وائرس (کووڈ-19) سے 6.4 کروڑ سے زیادہ لوگ انفیکشن کا شکار ہو چکے ہیں۔ برطانیہ میں اب تک کورونا وائرس کے سبب 16 لاکھ سے زیادہ لوگ بیمار ہوئے ہیں۔ اس درمیان برطانیہ میں اب عام لوگوں کے استعمال کے لیے کورونا وائرس کی ویکسین کو منظوری ملنے سے عوام نے راحت کی سانس لی ہے۔