وزیر اعلی بھگونت مان لیپٹوسپائروسس پازیٹیو، کیسے چلے گی پنجاب کی حکومت؟

دو دن پہلے موہالی کے فورٹس اسپتال میں داخل کرائے گئے پنجاب کے وزیر اعلی بھگونت سنگھ مان لیپٹوسپائروسس پازیٹیو پائے گئے ہیں اور انہیں کچھ دن اسپتال میں رہنا پڑ سکتا ہے۔ اب بڑا سوال یہ ہے کہ پنجاب میں حکومت کی ذمہ داری کس کی ہوگی اور وہاں کی حکومت کیسے چلے گی؟

ہفتہ کی شام اسپتال کی طرف سے جاری ہیلتھ بلیٹن کے مطابق جیسا کہ بخار میں مبتلا وزیر اعلیٰ کے داخلے کے وقت شبہ تھا، ان کے خون کے نمونے لیپٹوسپائروسس پازیٹیو پائے گئے ہیں۔ انہیں اینٹی بائیوٹکس دی جارہی ہیں۔ ان کی صحت کے تمام ٹیسٹ تسلی بخش بہتری دکھا رہے ہیں۔

وزیراعلیٰ کو جمعرات کو اسپتال میں داخل کرایا گیا تھا۔اسپتال کے بیان کے مطابق اسپتال کے ڈائریکٹر اور کارڈیالوجی ڈیپارٹمنٹ کے سربراہ ڈاکٹر آر کے جسوال نے وزیر اعلیٰ کا معائنہ کیا۔ انہوں نے بتایا کہ وزیراعلیٰ کی صحت میں بہتری آرہی ہے۔ ان کے پھیپھڑوں کی نس میں دباو کے حوالے سے بھی علاج کے نتائج آرہے ہیں۔ اسپتال کے بیان کے مطابق وزیر اعلیٰ کی حالت مستحکم ہے۔تاہم ہیلتھ بلیٹن میں اس بات کا ذکر نہیں کیا گیا کہ وزیر اعلیٰ کو اسپتال سے کب چھٹی دی جائے گی۔