بچوں کا کمرہ: کس طرح سجائیں ننہے-منوں کی نرالی دنیا!

اس کے لئے پہلے اپنے بچوں کی دلچسپی کو جانیں، بچوں سے اس بارے میں بات کریں، ان کی پسند کے رنگ، ان کی سوچ وسمجھ کو جانیں، دلچسپی جاننے کے بعد طے کریں کہ کمرے میں انہیں ساری سہولیت دستیاب ہوں۔ کمرے میں استعمال کی جانے والی چیزوں کا استعمال کم سے کم چار سے پانچ برس تک ہو سکے کیونکہ بچے بہت جلدی بڑے ہوتے ہیں۔ عام طور پر بچوں کے کمرے میں ایک آرام بخش بستر ہونا چاہیے، اسے آپ کارٹون بنی ہوئی چادر سے سجا سکتی ہیں۔ آج کل بازار میں بہت سی رنگ برنگی چادریں دستیاب ہیں۔ بستر کو آپ اسٹفڈ کھلونے سے سجا سکتی ہیں۔ بچے اسٹفڈ کھلونے بہت پسند کرتے ہیں اور بستر پر ان کی موجودگی انہیں تحفظ کا احساس بھی دلاتی ہے۔

پڑھائی بچوں کے روز کے معمول میں شامل ہے۔ اس لئے ایک اسٹڈی ٹیبل کا ہونا بے حد ضروری ہے۔ اس ٹیبل کا رنگ کمرے کی دیوار سے ملتا جلتا ہو۔ جیسے اگر کمرے کا رنگ ہلکا نیلا ہے تو ٹیبل کارنگ بھی نیلا ہو نا چاہیے۔ یہ انتخاب بہت دلکش نظر آتا ہے۔ اسٹڈی ٹیبل پر ایک خوبصورت سالیمپ رکھا جا سکتا ہے۔ جو ٹیبل کی رونق بڑھانے کے ساتھ ساتھ کمرے کی خوبصورتی میں بھی چار چاند لگا دے گا۔ اس ٹیبل کے اوپر کتاب رکھنے کے لئے بادھوں کی ایک شیلف بنائیں تاکہ کتابیں نکالنے اور رکھنے میں آسانی ہو۔ اس ٹیبل کے سائیڈ میں کوڑے دان ضرور رکھیں۔ یہاں آپ معلومات فراہم کرنے والے پوسٹر بھی لگا سکتے ہیں۔

بچوں کے کمرے میں ایک کونا کھیلنے کے لئے بھی رکھیں۔ یہاں پر رنگ برنگے خوبصورت ٹینٹ لگا سکتے ہیں۔ بچوں کے لئے یہ نرالی چیز ہے۔ اس میں کھیلنے میں انہیں مزا آئے گا۔ کمرے کے کونے میں ایک ٹب رکھ دیں جس میں بچے کھیلنے کے بعد سہیج کر اپنے کھلونے رکھ سکیں۔ اگر آپ فن کار ہیں تو آپ اس کے کمرے میں دیوار کے نچلے حصے میں بلیک بورڈ پینٹ کروا سکتے ہیں۔

کمرے کی دیوار پر خوبصورت سے کارٹون پوسٹر یا کارٹون بنائے جاسکتے ہیں۔ بچوں کے ذریعہ بنائی گئی ڈرائنگ کو بھی دیوار پر لگایا جاسکتا ہے۔ اس سے آ پ کے بچوں کو خوشی کے ساتھ ساتھ حوصلہ افزائی بھی ہوگی۔ حوصلہ افزائی سے ان کے اندر اچھا کرنے کے لئے دلچسپی بڑھے گی۔ بچوں کے تعلق سے بہت سی کارٹون فلموں کے کردار پر مبنی تصاویر کا انتخاب بھی کمروں کی سجاوٹ میں کیا جا سکتا ہے۔ جیسے آج عبد الباری کردار بھی بچوں میں بے حد مقبول ہے اس کی کہانیاں جو اسلامی تعلیمات پرمبنی ہوتی ہیں اور بچے بے حد پسند کرتے ہیں۔ ساتھ ہی ان کہانیوں سے بچوں کو رہن سہن اور سماجی زندگی کو سمجھنے کی راہ دکھاتے ہیں۔

بچوں کے کمروں کی چھت پر آج کل ”گلو“ ستارے لگانے کا رواج ہے۔ کمرے میں اندھیرا ہونے پر یہ ستارے چمکتے ہیں اور رات کو سوتے وقت یہ بہت ہی دلکش نظر آتے ہیں۔ جیسے آپ کے بچوں کو ستاروں کی دنیا میں لے جانے کے لئے کھڑے ہوں۔ ان سے کمرے کو ضرور سجائیے۔

بچوں کے کمرے میں الماری بھی ہونی چاہیے تاکہ بچوں کے کپڑے ڈھنگ سے رکھے جاسکیں۔ آپ اپنے بچوں کو بھی سکھائیں کہ الماری میں کپڑے کس طرح سے رکھے جاتے ہیں۔ بچوں کے کمرے میں پردے بھی چٹخ، رنگ برنگے ہونے چاہیے۔

گھڑی کسی بھی کمرے میں ایک ضروری شئی ہے۔ آج کل بہت خوبصورت گھڑیاں بازار میں موجود ہیں۔ خاص طور پر بچوں کی گھڑیاں جن پر کارٹون وغیرہ بنے ہوتے ہیں۔ ایسی ایک گھڑی کمرے کی خوبصورتی میں اضافہ کرے گی۔ اس کے ساتھ آپ بچوں کے کمرے کے لئے کوئی تھیم بھی سونچ سکتے ہیں۔

جیسے ایک ہی رنگ کی سبھی چیزیں، کارٹون کردار، پھل، تتلیاں وغیرہ۔ ایک کمپیوٹر و چھوٹا ٹی وی بھی یہاں رکھا جاسکتا ہے۔ بچوں کے مختلف طرح کے سی ڈیز بھی بازار میں دستیاب ہیں۔ اس طرح آپ اپنے بچوں کو رنگ برنگی دنیا دے سکتے ہیں۔ جو انہیں خوشگوار اور پر امید ماحول دے سکے تاکہ ان کی ذہنی نشو ونما ایک خوش اخلاق اور حوصلہ مند بچے کی طرح ہو۔