سنیل چھیتری کے20 سال بے مثال، 151 میچ, 94 گول،  ہندوستان اور کویت کےدرمیان میچ ڈرا

فیفا ورلڈ کپ 2026 کے کوالیفائر میچ میں ہندوستان اور کویت کے درمیان میچ 0-0 سے برابری پر ختم ہوا۔ یہ میچ کولکتہ کے سالٹ لیک اسٹیڈیم میں کھیلا گیا اور یہ ہندوستانی کپتان سنیل چھیتری کے کیریئر کا آخری میچ تھا۔ فائنل 18 مرحلے میں جانے کے لیے ہندوستان کے لیے یہ میچ جیتنا ضروری تھا۔ ہندوستان اب بھی اگلے مرحلے میں جا سکتا ہے لیکن اسے دوسرے میچوں پر انحصار کرنا پڑے گا۔

 میچ ختم ہونے کے بعد دیگر کھلاڑیوں نے چھیتری کی عزت افزائی کی اور اس دوران وہ جذباتی ہو گئے۔ ہندوستان کو پہلے اور دوسرے ہاف میں گول کرنے کے کئی مواقع ملے لیکن ہندوستان کسی بھی موقع سے فائدہ نہ اٹھا سکا۔ ہندوستان کا اگلا مقابلہ 11 جون کو قطر کے خلاف ہوگا۔

ہندوستانی کپتان کو  کویت کے دفاع میں مسلسل گھسنے کی کوشش کرتے ہوئے دیکھا گیا لیکن ان کی تمام کوششیں آخری لمحات تک ناکام ثابت ہوئیں۔ میچ ڈرا ہونے کی ایک بڑی وجہ یہ تھی کہ ہندوستانی ٹیم کا دفاع کئی مواقع پر کمزور دکھائی دیا جس کی وجہ سے کویت کئی بار گول کرنے کے بہت قریب آیا۔ اٹیکنگ ڈپارٹمنٹ میں ہندوستانی ٹیم ایک بار پھر سنیل چھیتری پر زیادہ تر انحصار کرتی نظر آئی۔ میچ ختم ہونے کے بعد، سالٹ لیک اسٹیڈیم میں تقریبا 58،000 لوگوں نے کھڑے ہو کر سنیل چھیتری کو داد دی۔

گو کہ کویت کے ساتھ ہندوستان کا میچ ڈرا پر ختم ہوا لیکن اس کے بعد سب کی نظریں سنیل چھیتری پر ٹک گئیں۔ پورے ہندوستانی دستے نے انہیں گارڈ آف آنر بھی دیا لیکن اس لمحے نے انہیں جذباتی کر دیا۔ سنیل اپنے آنسوؤں پر قابو نہ رکھ سکے اور اپنی جرسی سے آنسو پونچھتے نظر آئے۔

سنیل چھیتری نے اپنے بین الاقوامی فٹ بال کیریئر میں 151 میچ کھیلے جس میں انہوں نے 94 گول اسکور کیے۔ سنیل وہ کھلاڑی بھی تھے جنہوں نے اب تک کی تاریخ میں ہندوستانی ٹیم کے لیے سب سے زیادہ 4 ہیٹ ٹرک اسکور کیں۔ چھتری بین الاقوامی فٹ بال میں دنیا کے چوتھے سب سے زیادہ گول کرنے والے کھلاڑی تھے۔ اس فہرست میں پرتگال کے کرسٹیانو رونالڈو (128)، ایران کے علی ڈائی (108) اور ارجنٹائن کے لیونل میسی (106) ان سے اوپر تھے۔