کورونا پازیٹو فرانسیسی فٹ بال کلب کے ڈاکٹر نے کی خودکشی

ماسکو: فرانس کے اسٹیڈ ڈی ریمس فٹ بال کلب کے ڈاکٹر برنارڈ گونزالیز نے کورونا وائرس میں مبتلا ہونے کے بعد قرنطینہ کے دوران خودکشی کرلی ہے۔ فرانسیسی لی پیرسین اخبار کی خبر کے مطابق گونزالیز کورونا سے متاثر ہونے کے بعد گوشہ تنہائی میں تھے۔ اپنی جان لینے سے پہلے 60 سالہ گونزالیز اپنی اہلیہ کے ساتھ گھر میں ہی رہ رہے تھے، میڈیا کے مطابق ڈاکٹر کی اہلیہ بھی کووڈ 19 سے متاثرہوگئی تھیں۔ انہوں نے خودکشی سے متعلق اپنے فیصلے کی وضاحت کرتے ہوئے ڈیتھ نوٹ بھی چھوڑا ہے۔

متوفی سے اچھی شناسائی رکھنے والے ریمس کے میئر ارناڈ روبینیٹ نے کہا کہ وہ اس خط سے واقف ہیں۔ میں ان کے والدین، ان کی بیوی اور ان کے کنبے کے غم میں برابر کا شریک ہوں۔ وہ کورونا کے شکار ہوئے ہیں۔ روبینیٹ نے اخبار کو بتایا کہ مجھے معلوم ہے کہ انہوں نے اپنے فیصلے کی وضاحت کے لئے ایک نوٹ چھوڑا ہے، لیکن میں اس سے متفق نہیں ہوں۔ وہ نہایت ملنسار اور بہت محبت کرنے والے آدمی تھے۔ اس دوران کلب کے ایک ذرائع نے میڈیا کو بتایا کہ وہ اس بات سے بھی واقف نہیں تھے کہ گونزالیز کورونا سے متاثر ہیں حالانکہ انہوں نے ایک ہفتہ قبل ہی ان سے بات کی تھی۔

واضح رہے کہ فرانسیسی حکومت کے مطابق ملک میں اس وقت تصدیق شدہ کووڈ 19 کے 70،478 معاملات ہیں، جن میں سے 8،000 سے زیادہ سنگین ہیں جبکہ 16،000 سے زیادہ افراد صحتیاب ہوئے ہیں۔