جب لتا منگیشکر کو زہر دے کر قتل کرنے کی کوشش کی گئی! ’اگر مجروح سلطان پوری نہ ہوتے تو...‘

ممبئی: ملک کی مایہ ناز گلوکارہ لتا منگیشکر کے انتقال سے بالی ووڈ اور کروڑں مداح میں غم کی لہر ہے۔ اہم شخصیات کی جانب سے انہیں خراج عقیدت پیش کئے جانے کا سلسلہ لگاتار جاری ہے۔ لتا منگیشکر نے 92 سال کی عمر میں اس دنیا کو الوداع کہا، لیکن کیا آپ کو معلوم ہے کہ وہ جب 33 سال کی تھیں تو انہیں زہر دے کر قتل کرنے کی کوشش کی گئی تھی!

اپنی زندگی کے اس واقعہ کو خود لتا منگیشکر نے بیان کیا تھا۔ اپنے ایک انٹرویو میں انہوں نے اس واقعہ کو بیان کیا، تو دنیا حیران رہ گئی تھی۔ لتا منگیشکر نے انٹرویو کے دوران کہا، ’’ہم اس بارے میں بات نہیں کرتے کیونکہ یہ ہماری زندگی کا بھیانک دور تھا۔ یہ بات سال 1963 کی ہے، ان دنوں مجھے اچانک کمزوری محسوس ہونے لگی تھی۔ رفتہ رفتہ یہ کمزوری اتنی بڑھ گئی کہ میں بستر سے بھی بمشکل اٹھ پاتی تھی۔ حالات یہ ہو گئے تھے کہ میں اپنے دم پر چل پھر بھی نہیں سکتی تھی۔‘‘

لتا جی نے مزید بتایا کہ انہوں نے ڈاکٹروں سے رجوع کیا تو معلوم ہوا کہ انہیں ہلکا زہر دیا گیا تھا۔ انہوں نے کہا کہ یہ دور ان کی زندگی کے لئے کسی امتحان سے کم نہیں تھا۔ تاہم علاج کے بعد وہ دھیرے دھیرے شفایاب ہو گئیں۔ انہوں نے کہا کہ ڈاکٹروں کے علاج اور میری ثابت قدمی سے میں زندہ رہ سکی۔ تین مہینے تک بستر پر رہنے کے بعد وہ پھر سے گانے ریکارڈ کرنے کے لائق ہو سکی تھیں۔

جب لتا منگیشکر سے زہر دینے والے کے بارے میں پوچھا گیا تو انہوں نے کہا کہ انہیں یہ معلوم ہو گیا تھا کہ زہر کسنے دیا تھا لیکن ثبوتوں کی عدم دستیابی کے سبب انہوں نے کوئی قانونی کارروائی نہیں کی۔ لتا جی نے بتایا کہ شفایاب ہونے کے دنوں میں مجروح سلطان پوری ہر شام گھر آ جاتے تھے اور انہیں نظمیں سناتے تھے، جس سے ان کا دل بہل جاتا تھا۔

لتا منگیشکر نے کہا، ’’میری شفایابی میں مجروح سلطان پوری کا اہم کردار تھا۔ اپنی مصروفیت کے باوجود وہ مجھے ہر روز ضرور ملنے آتے تھے۔ یہاں تک کہ میرے لئے ڈنر میں بنا سادہ کھانا بھی کھاتے تھے اور مجھے کمپنی دیتے تھے۔ اگر مجروح سلطان پوری نہ ہوتے تو میں شاید اس مشکل سے باہر آنے میں کامیاب نہ ہو پاتی۔‘‘