'یہ نہ ایران ہے اور نہ ہی شام'نوپور شرما کے بیان کے بعد ہنگامہ آرائی پر بولےوویک اگنی ہوتری

بھارتیہ جنتا پارٹی کی سابق ترجمان نوپور شرما کے متنازعہ بیان کو لے کر ملک بھر میں ماحول گرم ہے ۔ جمعہ یعنی کل نوپور شرما اور بی جے پی لیڈر نوین جندل کے بیانات کے خلاف ملک بھر کے مختلف شہروں میں سڑکوں پر مظاہرے دیکھنے میں آئے۔

دریں اثنا، فلم 'دی کشمیر فائلز' کے ڈائریکٹر وویک اگنی ہوتری نے ان مظاہرین کے خلاف آواز اٹھائی ہے اور ٹویٹ کر کے اپنے خیالات کا اظہار کیا ہے۔

درحقیقت بی جے پی لیڈر نوپور شرما کی طرف سے پیغمبر اسلام کے بارے میں کئے گئے متنازعہ بیان پر لکھنؤ، کرناٹک، کولکاتہ، رانچی جیسے کئی علاقوں میں زبردست احتجاجی مظاہرے ہوئے ہیں۔ اس احتجاج میں کئی مقامات پر نوپور شرما اور نوین جندل کے پتلے لٹکائے ہوئے دکھائے گئے۔

اس پر وویک اگنی ہوتری نے اپنے آفیشل ٹویٹر ہینڈل پر ایک کے بعد ایک ٹویٹ کیا ہے۔ وویک اگنی ہوتری نے ایک ٹویٹ میں کہا ہے کہ 'تمام دوستوں سے معذرت، لیکن میں یہ کہنا چاہوں گا کہ یہ ایران، عراق اور شام نہیں ہے۔ یہ ہے موجودہ ہندوستان، یہ آج کا ہندوستان ہے۔‘‘

واضح رہے اس متنازعہ بیان کے بعد بھارتیہ جنتا پارٹی نے پہلے ہی نوپور شرما کو پارٹی سے معطل کر دیا ہے۔ ایسے میں دی کشمیر فائلز کے ڈائریکٹر وویک اگنی ہوتری نے نوپور شرما کی معطلی کے حوالے سے اپنی رائے دی تھی۔ تب وویک اگنی ہوتری نے کہا تھا کہ 'آج ہندوستان ہندوستان کے خلاف ہے'۔