کانس فلم فیسٹیول میں ریلیز ہوا ’مجیب: دی میکنگ آف اے نیشن‘ کا ٹریلر

مشہور و معروف فلمساز شیام بنیگل کی فلم ’مجیب: دی میکنگ آف اے نیشن‘ کے ٹریلر نے 75ویں کانس فلم فیسٹیول میں سب کی توجہ اپنی طرف مبذول کی۔ فلم بنگلہ دیش کے بانی شیخ مجیب الرحمن کے ارد گرد گھومتی ہے۔ فلم کے بارے میں بولتے ہوئے شیام بنیگل نے کہا کہ شیخ مجیب الرحمن ایک غیر معمولی شخص تھے۔

مرکزی وزیر برائے اطلاعات و نشریات انوراگ ٹھاکر اور بنگلہ دیش کے وزیر برائے اطلاعات و نشریات حسن محمود کی موجودگی میں کان میں ہندوستانی پویلین میں 90 سیکنڈ کا یہ ٹریلر لانچ کیا گیا۔ میڈیا رپورٹس کے مطابق شیام بنیگل کانس فلم فیسٹیول میں شامل نہیں ہو سکے تھے، اس لیے بعد میں انھوں نے شکریہ ظاہر کرتے ہوئے ایک ویڈیو پیغام شیئر کیا۔

ویڈیو پیغام میں شیام بنیگل نے کہا کہ ’’یہ ایک ہندوستان-بنگلہ دیش مشترکہ پروڈکشن ہے، جو حقیقت میں اپنی طرح کا پہلا ہے۔ یہ ایک بہت ہی اہم فلم ہے کیونکہ مجھے نجی طور سے لگتا ہے کہ مجھے ایشیا کے کچھ بہترین اداکاروں کے ساتھ کام کرنے کا موقع ملا ہے۔ شیخ مجیب الرحمن ایک غیر معمولی شخص تھے۔‘‘

شیام بنیگل نے اپنے پیغام میں یہ بھی کہا کہ ’’وہ (شیخ مجیب الرحمن) ایک بہت ہی متوسط طبقہ سے تعلق رکھتے تھے اور ایک بہت ہی سادہ زندگی گزارتے تھے۔ لیکن ان کی ایک خواہش تھی جس نے انھیں بنگلہ دیش بنانے میں مدد کی۔ اس فلم پر کام کرنا بالکل حیران کن تھا۔‘‘