یوم اساتذہ پر کووند، نائیڈو، مودی اور سونیا نے نیک خواہشات پیش کیں

نئی دہلی: صدر رامناتھ کووند، نائب صدر ایم ونکیا نائیڈو، وزیراعظم نریندر مودی، کانگریس کی صدر سونیا گاندھی، سابق صدر راہل گاندھی، کانگریس کی جنرل سیکریٹری پرینکا گاندھی، وزیرداخلہ امت شاہ سمیت کئی دیگر لیڈروں نے جمعرات کو یوم اساتذہ (ٹیچرس ڈے) کے موقع پر سابق صدر داکٹر سرو پلی رادھا کرشنن کو یاد کرتے ہوئے تمام اساتذہ کو نیک خواہشات پیش کیں۔

صدر رام ناتھ كووند نے ٹوئٹر پر لکھا ’’یوم اساتذہ کے موقع پر میں ڈاکٹر سروپلی رادھا کرشنن کو خراج عقیدت پیش کرتا ہوں اور تمام اساتذہ کو مبارکباد دیتا ہوں ۔اساتذہ نوجوان دماغ کو مضبوط اقدار کے ساتھ متاثر کرتے ہیں اور ان کو علم اور خواب دیکھنے کے لئے حوصلہ افزا کرتے ہیں۔ ایسا کرنے سے، وہ ملک کی تعمیر میں اہم کردار ادا کرتے ہیں۔‘‘

واضح رہے کہ یوم اساتذہ ملک کے دوسرے صدر ڈاکٹر سرو پلی رادھا کرشنن کی جینتی پر تعلیم کے شعبہ میں ان کے بیش بہا تعاون کی یاد میں ہر سال پانچ ستمبر کو منایا جاتا ہے۔ آج ان کا 131 واں یوم پیدائش ہے۔

صدر کووند نے مزید کہا کہ عظیم دانشور ، سیاستداں اور بہترین اساتذہ میں شمار ملک کے سابق صدر ڈاکٹر رادھا کرشنن کی جینتی کو’یوم اساتذہ ‘ کے طور پر مناكر، ہم ان کے تئیں احترام و عقیدت پیش کرتے ہیں۔

نائب صدر ونکیانائیڈو نے ٹوئٹ کیاکہ ’’میں ہندستان کے پہلے صدر عظیم اسکالر اور توانائی بخش مقررڈاکٹر سرو پلی رادھا کرشنن کے یوم پیدائش اور یوم اساتذہ کے موقع پر اساتذہ کو سلام کرتا ہوں۔‘‘

انہوں نے کہاکہ ڈاکٹر رادھا کرشنن نے کہا تھا کہ اساتذہ و ہ ہیں جو خود احتساب میں مدد کرتے ہیں۔انہوں نے کہا تھا کہ استاد کوئی انسٹرکٹر نہیں ہے بلکہ ایک محبت کرنے والا رہنما ہے۔انہوں نے کہاکہ ہمیں زیادہ سے زیادہ اساتذہ کی ضرورت ہے جو ہمارے بچوں میں جمہوری اقدار، مساوات، آزادی ، انصاف، سیکولرازم، انسانیت کے لئے ہمدردی، انسانی حقوق کے لئے احترام اور لگن کا جذبہ پیدا کرسکیں۔

وزیر اعظم مودی جوکہ اس وقت روس کے دورے پر ہیں، انہوں یوم اساتذہ کے موقع پر ٹوئٹ کیا’’ٹیچر ڈے کے موقع پر تمام اساتذہ کو دلی مبارکباد۔ وزیراعظم نے ڈاکٹر راداکرشنن کے تعان کو یاد کرتے ہوئے انہیں غیرمعمولی استاد اور گرو قرار دیا۔

کانگریس صدر سونیا گاندھی نے اپنے پیغام میں کہا کہ میں ٹیچرس ڈے کے موقع پر تمام طلبا اور اساتذہ کو نیک خواہشات دیتی ہوں۔

کانگریس کے سابق صدر راہل گاندھی نے لکھا، ’’یوم اساتذہ کے موقع پر میں سن تمام لوگوں کا شکریہ ادا کرتا ہوں جن سے سال ہا سال میں نے سیکھا۔ ان میں سوشل میڈیا پر ٹرول کرنے والے، کچھ سیاسی ایجنڈا رکھنے والے صحافی اور میرے سیاسی حریف بھی شامل ہیں، جن کی شاطر چالوں، منفی تشہیر اور اشتعال نے مجھے بہت کچھ سکھایا اور مجھے مضبوط بنایا۔

کانگریس کی جنرل سیکریٹری پرینکا گاندھی نے بھی یوم اساتذہ پر ٹوئٹ کیا۔ انہوں نے لکھا، ’’ہر ایک یوم اساتذہ پر میں اپنی سب سے پسندیدہ ٹیچر مے لال کو یاد کرتی ہوں۔ وہ میری دوست بھی ہیں اور ہم نے ساتھ رنج و غم کے وقت کا اشتراک کیا اور خود کو سنبھالا۔ انہوں نے اپنی بیٹی کو کھو دیا لیکن رحم دلی اور انسانیت سے دستبردار نہیں ہوئیں۔

وزیر داخلہ امت شاہ نے ٹوئٹ کیا کہ ٹیچرس ڈے کے موقع پر قوم کو تعلیم یافتہ اور مہذب سماج کی تعمیر کرنے والوں کو ان کے مثالی کردار کے لئے تمام ساتذہ کو سلام اور سابق صدر رادھا کرشنن کی جینتی پر انہیں خراج عقیدت پیش کرتاہوں۔

مغربی بنگال کی وزیراعلی ممتا بنرجی نے ٹوئٹ کرکے کہا کہ آج ٹیچرس ڈے ہے۔ اساتذہ ہمارے گرو ہیں اور استاد اورشاگرد کی روایت کاہندستان نے پوری دنیا کو تحفہ دیا ہے۔ ٹیچرس ڈے کے موقع پر اسکولوں، کالجوں اور یونیورسٹیوں میں اساتذہ کی نمایاں شراکت کے لئے ’شکشا رتن سمان‘کے طورپر قدر کرتی ہوں۔