عالمی کپ: لیگ اسٹیج ختم ہوتے ہی ہیڈن نے ’ٹیم آف ٹورنامنٹ‘ کا کیا اعلان، 5 ہندوستانی کھلاڑی شامل

عالمی کپ 2023 کا لیگ اسٹیج ختم ہو چکا ہے۔ سبھی ٹیمیں اپنے 9-9 میچز کھیل چکی ہیں اور ہندوستان اپنے سبھی میچ جیت کر 18 پوائنٹس کے ساتھ پوائنٹس ٹیبل میں اول مقام پر ہے۔ دوسرا مقام جنوبی افریقہ (14 پوائنٹس)، تیسرا مقام آسٹریلیا (14 پوائنٹس) اور چوتھا مقام نیوزی لینڈ (10 پوائنٹس) کو حاصل ہوا ہے۔ پہلا سیمی فائنل 15 نومبر کو ہندوستان اور نیوزی لینڈ کے درمیان کھیلا جائے گا، جبکہ دوسرا سیمی فائنل 16 نومبر کو جنوبی افریقہ اور آسٹریلیا کے درمیان کھیلا جائے گا۔

لیگ اسٹیج ختم ہونے کے بعد آسٹریلیا کے سابق مایہ ناز کرکٹر میتھیو ہیڈن نے اپنی ٹیم آف ٹورنامنٹ کا اعلان کر دیا ہے۔ اہم بات یہ ہے کہ میتھیو کی ٹیم میں 5 ہندوستانی کھلاڑیوں کو جگہ ملی ہے۔ باقی ٹیموں کی بات کریں تو جنوبی افریقہ سے 3 کھلاڑیوں کوئنٹن ڈیکوک، ہنرک کلاسین، مارکو جانسن کا انتخاب کیا گیا ہے، جبکہ آسٹریلیا کے 2 کھلاڑیوں گلین میکسویل اور ایڈم زیمپا کو ٹیم میں جگہ ملی ہے۔ نیوزی لینڈ کی طرف سے عالمی کپ میں بہترین کارکردگی کا مظاہرہ کرنے والے رچن رویندر نے بھی ہیڈن کی ٹیم میں جگہ بنانے میں کامیابی حاصل کر لی ہے۔

ہیڈن نے جو ٹیم آف ٹورنامنٹ کا انتخاب کیا ہے اس میں بتایا ہے کہ روہت شرما اور کوئنٹن ڈیکوک کا انتخاب بطور سلامی بلے باز ہوا ہے۔ تیسرے نمبر پر وراٹ کوہلی بلے بازی کے لیے اتریں گے اور چوتھے مقام پر رچن رویندر ہوں گے۔ اس کے بعد گلین میکسویل اور ہنرک کلاسین کا نمبر آئے گا، پھر رویندر جڈیجہ، مارکو جانسن، محمد سمیع، جسپریت بمراہ اور ایڈم زیمپا ہوں گے۔