رنکو اور ریڈی کے طوفان میں اڑ گئی بنگلہ دیشی ٹیم، ہندوستان کا ٹی-20 سیریز پر قبضہ، 3 نئے ریکارڈ بھی درج

ہندوستان اور بنگلہ دیش کے درمیان تین ٹی-20 میچوں کی سیریز کا آج دوسرا میچ دہلی میں کھیلا گیا جس میں رنکو سنگھ اور نتیش ریڈی کا زبردست طوفان دیکھنے کو ملا۔ پہلے ٹی-20 میچ میں جیتنے والی ہندوستانی ٹیم نے دوسرے میچ کو جیت کر اس سیریز پر قبضہ کر لیا ہے، اور اب آخری ٹی-20 میچ 12 اکتوبر کو کھیلا جائے گا جب ہندوستان کی نظر بنگلہ دیش کا مکمل صفایا کرنے پر ہوگی۔

ہندوستانی ٹیم نے آج پہلے بلے بازی کرتے ہوئے 20 اوورس میں 9 وکٹ کے نقصان پر 221 رنوں کا پہاڑ کھڑا کر دیا تھا۔ جواب میں بنگلہ دیش کی ٹیم 20 اوورس میں 9 وکٹ کے نقصان پر 135 رن ہی بنا سکی۔ اس طرح ہندوستان نے یہ میچ 86 رنوں کے بڑے فرق سے جیت لیا۔

بنگلہ دیش نے ٹاس جیت کر پہلے گیندبازی کرنے کا فیصلہ کیا تھا، جو اس کے لیے مہلک ثابت ہوا۔ ہندوستانی ٹیم کی شروعات تیز ضرور تھی، لیکن اچھی نہیں کہی جا سکتی کیونکہ 3 وکٹ جلدی جلدی آؤٹ ہو گئے تھے۔ پاور پلے میں ہی ابھشیک شرما، سنجو سیمسن اور کپتان سوریہ کمار یادو پویلین لوٹ گئے تھے۔ اس کے بعد نتیش ریڈی اور رنکو سنگھ نے بنگلہ دیشی گیندبازوں پر اس طرح حملہ کیا کہ حالات لمحہ بھر میں بدل گئے۔ ریڈی نے 28 گیندوں میں اپنی نصف سنچری مکمل کی، جبکہ رنکو نے 27 گیندوں پر ہی نصف سنچری بنا ڈالی۔

نتیش ریڈی نے کمال کی بلے بازی کرتے ہوئے 7 چھکے اور 4 چوکے لگائے۔ انھوں نے 34 گیندوں میں 74 رنوں کی اننگ کھیلی۔ رنکو کے ساتھ اس کھلاڑی نے سنچری شراکت داری کی۔ رنکو سنگھ نے 29 گیندوں پر 53 رنوں کی اننگ کھیلی جس میں 3 چھکے اور 5 چوکے شامل تھے۔ بنگلہ دیش کی طرف سے تسکین احمد واحد گیندباز تھے جنھوں نے 4 اوورس میں 16 رن دیتے ہوئے کفایتی گیندبازی کی اور 2 وکٹ بھی حاصل کیے۔

جب بنگلہ دیش کی بلے بازی شروع ہوئی تو دباؤ میں پوری ٹیم بکھر سی گئی۔ ہندوستانی ٹیم کو پہلی کامیابی عرشدیپ سنگھ نے دلائی۔ انھوں نے ایمان کو بولڈ کر دیا۔ اس کے بعد واشنگٹن سندر نے کپتان نجم الحسن شانتو کو پویلین بھیج دیا۔ ورون چکرورتی نے کمال کی گیندبازی کی جنھوں نے 4 اوورس میں محض 19 رن دے کر 2 وکٹ لیے۔ ابھشیک شرمنا، مینک یادو اور ریان پراگ کو بھی 1-1 وکٹ ملے۔ نتیش ریڈی کے حصے میں 2 وکٹ آئے۔ بنگلہ دیش کی طرف سے محمود اللہ (39 گیندوں پر 41 رن) کے علاوہ کوئی بھی بلے باز زیادہ دیر تک میدان پر ٹک نہیں سکا۔ لٹن داس، شانتو، مہدی حسن کو شروعات تو ملی لیکن وہ اسے بڑی اننگ میں تبدیل نہیں کر سکے۔

ہندوستان کے لیے ایک بڑی بات آج کے میچ میں یہ ہوئی کہ تین اہم ریکارڈ ان کے حصے میں درج کیے گئے۔ وہ ریکارڈ اس طرح ہیں:

• ہندوستانی ٹیم نے بنگلہ دیش پر 86 رنوں سے جیت درج کی۔ یہ بنگلہ دیش کے خلاف اس کی سب سے بڑی ٹی-20 فتح ہے۔

• ہندوستانی ٹیم نے بنگلہ دیش کے خلاف 7 گیندبازوں کا استعمال کیا اور سبھی نے کم از کم ایک وکٹ حاصل کیا، جو کہ ہندوستانی ٹیم کے لیے پہلی بار ہوا ہے۔

• اس کیلنڈر سال میں ہندوستانی ٹیم کی فتح کا فیصد 95.23 ہے، جو کہ دنیا میں سب سے بہترین ہے۔