ٹی-20 عالمی کپ کے مکمل شیڈیول کا اعلان، 9 جون کو کھیلا جائے گا ہندوستان اور پاکستان کا مقابلہ

انٹرنیشنل کرکٹ کونسل (آئی سی سی) نے ویسٹ انڈیز اور یو ایس اے میں کھیلے جانے والے ٹی-20 عالمی کپ 2024 کا شیڈول جاری کر دیا ہے۔ گروپ ’اے‘ میں ہندوستان کا مقابلہ پاکستان، امریکہ، کناڈا اور آئرلینڈ سے رکھا گیا ہے۔ ٹورنامنٹ کا افتتاحی میچ یو ایس اے اور کناڈا کے درمیان یکم جون کو کھیلا جائے گا۔

جاری شیڈول کے مطابق ٹی-20 عالمی کپ 2024 کے دوران مجموعی طور پر 55 میچ کھیلے جائیں گے۔ ویسٹ انڈیز اور یو ایس اے کے 9 میدانوں میں یہ مقابلے ہوں گے جن میں تین امریکی شہر نیویارک سٹی، ڈلاس اور میامی ان عالمی کپ میچوں کی میزبانی کریں گے۔ ہندوستانی ٹیم اس ٹورنامنٹ میں اپنا پہلا میچ 5 جون کو آئرلینڈ کے خلاف کھیلے گئے۔ ہندوستانی ٹیم کا پاکستان سے مقابلہ 9 جون کو، یو ایس اے سے مقابلہ 12 جون کو اور کناڈا سے مقابلہ 15 جون کو ہوگا۔

ٹی-20 عالمی کپ کے سیمی فائنل اور فائنل مقابلے ویسٹ انڈیز میں کھیلے جائیں گے۔ 26 جون کو پہلا سیمی فائنل میچ گیانا میں کھیلا جائے گا، جبکہ دوسرا سیمی فائنل میچ 27 جون کو ترینداد میں کھیلا جائے گا۔ ٹورنامنٹ کا خطابی مقابلہ یعنی فائنل میچ 29 جون کو بارباڈوس میں ہوگا۔ جاری شیڈول کے مطابق یکم جون سے 18 جون تک لیگ اسٹیج کے میچ ختم ہو جائیں گے۔ سپر-8 کے میچ 19 سے 24 جون تک کھیلے جائیں گے۔

اس ٹورنامنٹ میں مجموعی طور پر 20 ٹیمیں حصہ لے رہی ہیں۔ ان سبھی ٹیموں کو ’اے‘، ’بی‘، ’سی‘ اور ’ڈی‘ گروپوں میں تقسیم کیا گیا ہے۔ ہر گروپ میں 5-5 ٹیمیں شامل ہیں۔ لیگ مقابلے کے بعد چاروں گروپ کی سرفہرست دو ٹیمیں سپر-8 میں پہنچیں گی۔ سپر-8 میں پہنچنے والی ٹیموں کو 2 گروپ میں تقسیم کیا جائے گا۔ پہلے گروپ میں ’اے‘ اور ’سی‘ گروپ کی نمبر-1 ٹیم کے ساتھ ساتھ ’بی‘ اور ’ڈی‘ گروپ کی نمبر-2 ٹیموں کو رکھا جائے گا۔ اسی طرح دوسرے گروپ میں ’بی‘ اور ’ڈی‘ کی نمبر-1 ٹیم کے ساتھ ساتھ ’اے‘ اور ’سی‘ کی نمبر-2 ٹیموں کو رکھا جائے گا۔ پھر دونوں ہی گروپ کی سرفہرست 2-2 ٹیمیں سیمی فائنل کے لیے کوالیفائی کریں گی۔

آئیے نظر ڈالتے ہیں کون سی ٹیم کس گوپ میں شامل ہے:

گروپ اے: ہندوستان، پاکستان، یو ایس اے، کناڈا، آئرلینڈ

گروپ بی: انگلینڈ، آسٹریلیا، نامیبیا، اسکاٹ لینڈ، عمان

گروپ سی: نیوزی لینڈ، ویسٹ انڈیز، افغانستان، یوگانڈا، پاپوا نیوگنی

گروپ ڈی: جنوبی افریقہ، سری لنکا، بنگلہ دیش، نیدرلینڈس، نیپال