ویسٹ انڈیز کے خلاف ہندوستان کی ٹی-20 ٹیم میں روہت اور کوہلی کو شامل نہ کیے جانے سے سورو گانگولی ناراض

ویسٹ انڈیز کے خلاف ہندوستانی ٹیم کو اگلے ماہ 5 میچوں کی ٹی 20 سیریز کھیلنی ہے جس کے لیے ہندوستانی ٹیم کا اعلان 5 جولائی کو ہو چکا ہے۔ ہندوستان کے سابق مایہ ناز کرکٹر سورو گانگولی نے اس ٹی-20 ٹیم میں روہت شرما اور وراٹ کوہلی کو شامل نہ کیے جانے پر ناراضگی ظاہر کی ہے۔ 51 سالہ گانگولی نے کہا کہ روہت اور کوہلی اب بھی ٹی-20 کرکٹ میں ہندوستانی ٹیم کے لیے اہم تعاون پیش کر سکتے ہیں۔

سورو گانگولی نے ایک اسپورٹس پلیٹ فارم سے بات چیت کرتے ہوئے کہا کہ ’’یقیناً اپنے بہترین کھلاڑیوں کو منتخب کرنا چاہیے، اس سے کوئی فرق نہیں پڑتا کہ وہ کون ہیں۔ میری رائے میں وراٹ کوہلی اور روہت شرما دونوں کی ہی ابھی ٹی-20 کرکٹ میں جگہ ہے۔ میں سمجھ نہیں پا رہا ہوں کہ کوہلی یا روہت ٹی-20 انٹرنیشنل میچ کیوں نہیں کھیل سکتے۔ کوہلی آئی پی ایل کے دوران شاندار فارم میں تھے۔ اگر آپ مجھ سے پوچھیں تو دونوں کی ٹی-20 کرکٹ میں جگہ ہے۔‘‘

روہت اور کوہلی کے علاوہ آئی پی ایل اسٹار رنکو سنگھ، ریتوراج گائیکواڈ اور جتیش شرما بھی ٹی-20 ٹیم میں جگہ حاصل کرنے میں ناکام رہے ہیں۔ اس تعلق سے گانگولی نے کہا کہ نوجوان کھلاڑی اپنی بہترین کارکردگی کا تسلسل برقرار رکھیں، ان کا وقت ضرور آئے گا۔ سابق کپتان نے کہا کہ ’’انھیں بس کھیلنا جاری رکھنا ہے اور بہترین پرفارمنس دیتے رہنا ہے۔ صرف 15 کو ٹیم میں منتخب کیا جا سکتا ہے، اور 11 کھیل سکتے ہیں۔ اس لیے کسی کی غلطی کا انتظار کیجیے جب وہ باہر ہوگا۔ مجھے پورا یقین ہے کہ ان (نوجوان کھلاڑیوں) کا وقت آئے گا۔‘‘