پی ایم مودی نے دھونی کو خط لکھ کر باندھے تعریفوں کے پُل، دھونی نے کہا 'شکریہ'

مہندر سنگھ دھونی کے ذریعہ بین الاقوامی کرکٹ سے ریٹائرمنٹ کے اعلان کے بعد مختلف شعبہ حیات سے تعلق رکھنے والے لوگوں نے مایوسی کا اظہار کیا ہے۔ کئی لوگوں نے ہندوستانی کرکٹ میں دیئے گئے ان کے تعاون کو یاد کیا ہے تو کئی نے بی سی سی آئی سے گزارش کی ہے کہ انھیں دوبارہ کھیلنے کے لیے تیار کیا جائے۔ اس درمیان وزیر اعظم پی ایم مودی نے بھی دھونی کی صلاحیتوں کا اعتراف کرتے ہوئے انھیں ایک ستائشی خط لکھا ہے۔

وزیر اعظم مودی نے اپنے خط میں دھونی کی تعریف کرتے ہوئے آگے کی زندگی کے لیے نیک خواہشات کا اظہار کیا ہے۔ خط میں انھوں نے دھونی کی زندگی کے کئی اہم لمحات کو یاد کیا، خصوصاً ٹی-20 عالمی کپ 2007 اور یک روزہ عالمی کپ 2011 میں ان کے تعاون کے لیے تعریف کی۔ پی ایم مودی نے خط میں دھونی کے ہیئر اسٹائل کو لے کر بھی تذکرہ کیا ہے اور بیٹی جیوا کے ساتھ ان کی بانڈنگ کا بھی تذکرہ کیا ہے۔

اس خط کے موصول ہونے پر دھونی نے ان کا شکریہ ادا کرتے ہوئے ایک ٹوئٹ کیا ہے۔ ٹوئٹ میں انھوں نے لکھا ہے کہ "ہر ایک فنکار، فوجی اور کھلاڑی کو تعریف کی خواہش ہوتی ہے۔ وہ چاہتے ہیں کہ ان کی محنت اور قربانی کے بارے میں ہر کوئی جانے۔ آپ کی جانب سے ملی تعریف اور نیک خواہشات کے لیے شکریہ وزیر اعظم نریندر مودی۔"

قابل ذکر ہے کہ پی ایم مودی نے دھونی کو خط 19 اگست کو لکھا تھا جو آج سوشل میڈیا پر کافی وائرل ہو رہا ہے۔ پی ایم مودی نے اپنے خط میں لکھا تھا کہ "آپ ہندوستانی کرکٹ کے سب سے کامیاب کپتانوں میں شامل ہیں۔ کرکٹ کی تاریخ میں آپ کا نام دنیا کے سب سے بہترین بلے بازوں، سب سے بہترین کپتانوں اور سب سے بہترین وکٹ کیپرس میں رہے گا۔ میچ کے دوران مشکل حالات میں سبھی کا آپ پر انحصار اور میچ کو ختم کرنے کا آپ کا اسٹائل نسلوں تک لوگوں کو یاد رہے گا، خاص طور سے عالمی کپ فائنل 2011 کا۔"

پی ایم مودی نے نہ صرف دھونی کی کرکٹ کے میدان میں ان کی کامیابیوں کی تعریف کی بلکہ انہوں نے ہندوستان اور دنیا میں کھیلوں کے لئے جو کچھ کیا اس کی بھی تعریف کی۔ انہوں نے کہا کہ آپ نے اپنے ہی انداز میں ویڈیو جاری کر کے اپنے ریٹائرمنٹ کا اعلان کیا جو ملک بھر میں زبردست موضوع بحث بن گیا۔ اگرچہ اس سے 130 کروڑ ہندوستانی مایوس ہوئے لیکن آپ نے ہندوستانی کرکٹ کے لئے جو کچھ کیا اس کے لئے دل سے آپ کے مشکور ہیں۔