عالمی کپ: ہند-پاک مقابلہ پر پاکستان کا اشتہار، ماڈل کو بنایا ابھینندن!

پلوامہ میں ہونے والے دہشت گرد حملہ کے بعد ہندوستانی فضائیہ کی جانب سے پاکستان کے بالاکوٹ میں ایئر اسٹرائیک کی گئی۔ اس کے بعد جب پاکستانی طیاروں نے ہندوستانی حدود کو عبور کیا تو ونگ کمانڈر ابھینندن ورتھمان نے پاکستانی طیاروں کو کھدیڑا اس دوران وہ سرحد کے پار چلے گئے۔ اب انگلینڈ میں چل رہے عالمی کپ ٹورنامنٹ میں اپنی ٹیم کو پروموٹ کرنے کے لئے پاکستان نے ایک اشتہار بنایا ہے جس میں ابھینندن کے بے باک انداز کو کاپی کیا گیا ہے۔

ہندوستان اور پاکستان کے درمیان 16 جون کو آئی سی سی عالمی کپ 2019 میں ہونے والے مقابلہ کے حوالہ سے بنایا گیا پاکستانی اشتہار سوشل میڈیا پر وائرل ہو گیا ہے۔ اس اشتہار میں ابھینندن ورتھمان کی طرح نظر آنے والا ایک پاکستانی ماڈل ان کی نقل کرتا نظر آ رہا ہے۔ ابھینند ورتھمان کو پاکستان میں جنگی قیدی بنائے جانے کے بعد پاکستانی فوج کی طرف سے ابھینندن سے پوچھے گئے سوالوں کے جوابوں کو اس اشتہار میں عالمی کپ سے جوڑ کر ایک مذاحیہ انداز میں پیش کیا گیا ہے۔

اشتہار میں پاکستانی ماڈل کو بالکل ونگ کمانڈر ابھینندن ورتھمان کا لُک دیا گیا ہے اور اس نے ابھینندن جیسی مونچھیں بھی لگا رکھی ہیں۔ وہ ان کی طرح کپ میں چائے بھی پی رہا ہے۔ ویڈیو میں ابھینندن کے ہم شکل اس ماڈل سے 16 جون کو ہونے والے ہندوتان-پاکستان کے میچ کے حوالہ سے سوال پوچھے جا رہے ہیں۔

یہ پوچھے جانے پر کہ ہندوستانی ٹیم کی پلیئنگ الیون اور پاکستان کے خلاف ٹیم انڈیا کی گیم اسٹریٹجی کیا ہوگی۔ اس پر ماڈل کہہ رہا ہے، ’آئی ایم سوری، آئی ایم ناٹ سپوسزڈ ٹو ٹیل یو دِس۔‘

اشتہار کے آخر میں چائے کے بارے میں پوچھے جانے پر ماڈل ’ٹی اِز فنٹیسٹک، تھینک یو‘ کہہ کر اور کپ لے کر نکلتا ہے، تو پیچھے سے آواز آتی ہے کہ ’رکو کپ کہاں لے کر جا رہے ہو۔‘ اس کے بعد اشتہار کے اختتام پر ہندوستان اور پاکستان کے میچ کی تاریخ اور ٹائم فلیش ہونے لگتے ہیں۔