عالمی کپ میں ہندوستان کا شاندار آغاز، جنوبی افریقہ پر 6 وکٹ سے جیت

ساؤتھمپٹن: لیگ اسپنر یجویندر چہل (51 رن، چار وکٹ) کی یادگار کارکردگی اور نائب کپتان روہت شرما (نابعد 122) کی سنچری کی بدولت دنیا کی دوسرے نمبر کی ٹیم ہندوستان نے آئی سی سی عالمی کپ میں اپنی مہم کی بہترین شروعات کرتے ہوئے پہلے مقابلے میں جنوبی افریقہ کو بدھ کے روز چھ وکٹ سے شکست سے دو چار کرا دیا۔ ہندوستان کا اگلا مقابلہ اب 9 جون کو آسٹریلیا سے ہوگا۔

ہندوستان نے عالمی کپ مقابلے میں جنوبی افریقہ کو نو وکٹ جھٹک کر 227 رن پر روکا اور پھر 47.3 اوور میں چار وکٹ پر 230 رن بناکر فاتحانہ آغاز کیا۔ چوکرس کے نام سے مشہور جنوبی افریقہ کو ٹورنامنٹ میں مسلسل تیسری شکست کا سامنا کرنا پڑا جس سے اس کی امیدوں کو سخت جھٹکا لگا۔ واضح رہے کہ ہندوستان کی آئی سی سی ٹورنامنٹ میں جنوبی افریقہ کے خلاف یہ مسلسل چھٹی جیت ہے۔

ہندوستان کی اس جیت کی بدولت وراٹ کوہلی کی کپتانی میں ایک اور کامیابی جڑ گئی، وہ اب ان کپتانوں کے خصوصی کلب میں شامل ہو گئے ہیں جن کی کپتانی میں ہندوستان نے 50 میچ جیتے ہیں۔ وراٹ کوہلی کی کپتانی میں اب تک 69 میچ کھیلے گئے ہیں جن میں سے 17 میں ہندوستان کو ہار کا سمنا کرنا پڑا جبکہ ایک میچ ٹائی اور ایک میچ منسوخ ہو گیا۔

قبل ازیں، لیگ اسپنر يجویندر چہل نے اپنے عالمی کپ میں شاندار گیدبازی کرتے ہوئے 51 رن پر چار وکٹ لئے جس کی بدولت ہندوستان نے جنوبی افریقہ کو عالمی کپ میچ میں بدھ کو نو وکٹ پر 227 رن پر روک دیا۔

جنوبی افریقہ نے اس میچ میں پانچ وکٹ 89 رن پر گنوانے کے بعد شاندار واپسی کی اور نچلے مڈل آرڈر کی شاندار شراکت کی بدولت قابل دفاع اسکور بنا لیا۔ ٹاس جیت کر پہلے بلے بازی کرنے والی جنوبی افریقہ کی شروعات خراب رہی اور 23 اوور تک اس نے پانچ وکٹ 89 رن پر گنوا دیے تھے لیکن ڈیوڈ ملر نے 31، آندلے فیہلوکوایو نے 34، کرس مورس نے 42 اور كیگسو ربادا نے ناٹ آؤٹ 31 رنز بنا کر جنوبی افریقہ کو 227 تک پہنچایا۔

لیگ اسپنر چہل نے 10 اوور میں 51 رن دے کر چار وکٹ حاصل کئے اور جنوبی افریقہ کے ٹاپ آرڈر کو تباہ کردیا۔ تیز گیند باز جسپريت بمراه نے اپنا 50 واں ون ڈے کھیلتے ہوئے 10 اوور میں 35 رن پر دو وکٹ حاصل کئے۔

بھونیشور کمار نے اپنے دو وکٹ اننگز کے آخری اوور میں لئے۔ بھونیشور نے 10 اوور میں 44 رن دیے۔ کلدیپ یادو نے 10 اوور میں 46 رن پر ایک وکٹ لیا۔ْآل راؤنڈر ہاردک پانڈیا چھ اوور میں 31 اور پارٹ ٹائم آف اسپنر کیدار جادھو چار اوور میں 16 رن دے کر کوئی وکٹ نہیں لے سکے۔