حیدرآباد: انڈیا اور آسٹریلیا ٹی-20 میچ کی ٹکٹوں کے لئے جمخانہ میدان میں لگاتار دوسرے دن افرا تفری

حیدرآباد: جمخانہ میدان سکندرآباد میں ہندوستان اور آسٹریلیا کے درمیان کھیلے جانے والے ٹی-20 میچ کے ٹکٹوں کے لیے افراتفری لگاتار دوسرے دن بھی جاری رہی اور لائن ٹکٹ بک کرنے والے متعدد شائقین کو مایوس لوٹنا پڑا۔ دراصل، راجیو گاندھی اسٹیڈیم میں 25 ستمبر کو کھیلے جانے والے سیریز کے تیسرے میچ کے لئے آن لائن ادائیگی کرنے والے لوگ، ٹکٹ حاصل کرنے کے لئے جمعہ کی صبح بھی جمخانہ میدان میں جمع ہونا شروع ہو گئے۔

خیال رہے کہ یہاں گزشتہ روز بھی زبردست افرا تفری نظر آئی تھی اور پولیس اہلکاروں سمیت کئی افراد زخمی ہوئے تھے۔ پولیس کو ہجوم کو قابو میں کرنے کے لئے لاٹھی چارج کا بھی استعمال کرنا پڑا تھا۔

رپورٹ کے مطابق شائقین کو مبینہ طور پر حیدرآباد کرکٹ ایسوسی ایشن (ایچ سی اے) کی جانب سے یہ بتایا گیا تھا کہ وہ اپنے کیو آر کوڈ، شناختی کارڈ اور تصویر کو پیش کر کے آسانی سے اپنا ٹکٹ حاصل کر سکتے ہیں لیکن جب وہ میدان میں پہنچے تو پولیس نے انہیں روک دیا۔ شائقین کا الزام ہے کہ شناختی کارڈ ظاہر کئے جانے کے باوجود پولیس نے انہیں اندر آنے کی اجازت فراہم نہیں کی۔

دریں اثنا، ایچ سی اے نے داخلی دروازے پر ایک بینر نصب کیا گیا ’’23 اور 24 ستمبر کو جمخانہ میدان پر ٹکٹیں فروخت نہیں کی جا رہی ہیں۔ شائقین سے تعاون کی اپیل ہے۔‘‘ شائقین ٹکٹوں کی فروخت کے حوالہ سے پیدا ہونے والے غیر واضح صورت حال سے ناراض نظر آئے اور انہوں نے وہاں تعینات پولیس اہلکاروں سے تو تو میں میں کی۔ بعد میں پے ٹی ایم کے عہدیدار آن لائن ادائیگی کرنے والے شائقین کو ٹکٹ جاری کرنے کے لئے خود جمخانہ میدان پہنچے۔

پولیس کو بھاری ہجوم کو قابو میں کرنا مشکل ہو رہا تھا اور بڑی تعداد میں لوگ وہاں اس انتظار میں کھڑے تھے کہ شائد منتظمین کی جانب سے آف لائن ٹکٹوں کی فروخت بھی شروع کی جائے گی۔ تاہم، ایچ سی اے نے آن لائن اور آف لائن فروخت کی گئیں ٹکٹوں کی تعداد کے حوالہ سے تفصیل جاری نہیں کی ہے۔

جمخانہ میدان پر ہونے والی افرا تفری کے حوالہ سے تلنگانہ کے کھیل وزیر وی سرینواس نے ناراضگی کا اظہار کرتے ہلوئے ایچ سی اے کے چیرمین محمد اظہرالدین سمیت عہدیداران سے وضاحت طلب کی ہے۔ سابق کپتان اظہرالدین نے اس واقعہ کو افسوسناک قرار دیا ہے، تاہم ان کا کہنا ہے کہ ایچ سی اے کی جانب سے کوئی غلطی نہیں کی ہے۔ انہوں نے کہا کہ لوگ تین سال کے طویل وقفہ کے بعد کرکٹ میچ دیکھنے کے لئے بے تاب ہیں لیکن ہر ایک کو مطمئن نہیں کیا جا سکتا۔