جنوبی افریقہ کے سابق کپتان گریم اسمتھ نسل پرستی کے الزامات سے بری

جوہانسبرگ: جنوبی افریقہ کے سابق کپتان اور کرکٹ جنوبی افریقہ (سی ایس اے) کے کرکٹ ڈائریکٹر رہے گریم اسمتھ کو ایس جے این کمیشن کی رپورٹ کی بنیاد پر نسل پرستانہ رویے کے الزامات سے بری کر دیا گیا ہے۔ یہ فیصلہ آزادانہ ثالثی کے عمل کے بعد کیا گیا ہے۔ ایس جے این رپورٹ کی بنیاد پر وکیل نگواکو مینیٹزے ایس سی اور مائیکل بشپ نے اسمتھ کو بے قصور قرار دیا۔ اس عمل کا خرچ سی ایس اے کو ہی برداشت کرنا ہوگا۔

اس عمل کے دوران یہ ثابت ہوا کہ اسمتھ نے 2012 سے 2014 کے درمیان وکٹ کیپر تھامی تسولیکوئل کے ساتھ کوئی امتیازی سلوک نہیں کیا، جب سنٹرل کنٹریکٹ ملنے کے باوجود تسولیکوئل کو ٹیسٹ اسکواڈ میں شامل نہیں کیا گیا۔ اسمتھ پر ساتھ ہی یہ الزام تھا کہ وہ سی ایس اے میں سیاہ فام قیادت گروپ اور خاص طور پر سی ای او تھابنگ موروئے کے ساتھ کام کرنے سے خوش نہیں تھے اور انہوں نے 2019 میں قومی ٹیم کے کوچ کی تقرری میں مداخلت کرتے ہوئے مارک باؤچر کو انوک اینکوے سے آگے رکھا تھا۔ ان دونوں معاملوں میں بھی ان کے خلاف کوئی ثبوت نہیں ملے۔

مارچ میں پارلیمنٹ کے سامنے سی ایس اے کی تحقیقات کی تفصیلات دیتے ہوئے، بورڈ کے صدر لاسن نائیڈو نے آخری الزام کی تردید کرتے ہوئے کہا کہ اسمتھ اور باؤچر دونوں کی تقرری پہلے سے تشکیل شدہ بورڈ کی نگرانی اور منظوری کے ساتھ کی گئی تھی۔ ایس جے این نے دونوں کی تقرری کے عمل پر تشویش کا اظہار کیا تھا۔

اگرچہ اسمتھ پر اب باؤچر کی تقرری میں نسل پرستانہ کی بنیاد پر امتیازی سلوک کا الزام لگایا گیا ہے، تاہم باؤچر کو بدانتظامی کے الزامات پر آئندہ ماہ تادیبی سماعت کا سامنا کرنا پڑے گا۔ ان الزامات کی بنیاد پر سی ایس اے نے انہیں ہیڈ کوچ کے عہدے سے ہٹانے کا مطالبہ بھی کیا ہے۔ فی الحال، باؤچر کا معاہدہ 2023 کے ون ڈے ورلڈ کپ کے اختتام تک ہے۔