ونڈیز دورے سے الگ ہوئے دھونی، سیاچن میں لے سکتے ہیں ٹریننگ

نئی دہلی / ممبئی: اپنے فیصلوں سے سب کو چونکانے کے لئے مشہور سابق ہندوستانی کپتان اور تجربہ کار وکٹ کیپر مہندر سنگھ دھونی نے اگلے ماہ ہونے والے ویسٹ انڈیز کے دورے سے خود کو الگ کر لیا ہے اور ممکن ہے کہ اب وہ سیاچن میں فوج کے ساتھ ٹریننگ کر سکتے ہیں۔

دھونی کے اس فیصلے سے سلیکٹرز کا درد سر ختم ہوگیا ہے جنہیں اب یہ فیصلہ نہیں کرنا ہوگا کہ دھونی کو ونڈیز دورے سے باہر کردیا گیا ہے۔ سابق کپتان نے اتوار کو اس دورے کے لیے ہونے والی سلیکٹرز کی میٹنگ سے قبل ہی خود کے دستیاب نہ ہونے کی بات کہی۔

دھونی علاقائی فوج کے پیراشوٹ ریجمنٹ میں اعزازی لیفٹیننٹ کرنل کے عہدے پر ہیں اور فوج سے ان کی محبت جگ ظاہر ہے۔ دھونی نے ورلڈ کپ میں ہندوستان کے ابتدائی میچ میں کیپنگ کرتے ہوئے جو دستانے پہنے تھے ان پر فوج کی قربانی کی علامت بنی ہوئی تھی۔ اگرچہ آئی سی سی کے اعتراض کی وجہ سے انہیں یہ علامت ہٹانی پڑی تھی۔

سابق کپتان خود كو ونڈيز دورے سے الگ کر کے اگست میں فوج میں ٹریننگ کے لئے جا سکتے ہیں۔ ایساسمجھا جا رہا ہے کہ وہ سیاچن میں ٹریننگ کر سکتے ہیں لیکن ابھی تک سرکاری طور پر واضح ہوکر کچھ بھی سامنے نہیں آیا ہے۔

انگلینڈ میں ختم ہوئے عالمی کپ کے بعد لگاتار قیاس آ رائیاں کی جارہی تھیں کہ دھونی کو ونڈيز دورے میں ٹیم سے باہر رکھا جا سکتا ہے۔ ہندوستان کو اس دورے میں ٹوئنٹی 20، ون ڈے اور ٹیسٹ میچ کھیلنے ہیں۔ عالمی کپ میں دھونی کی کارکردگی پر تنقید کی گئی تھی اور ان کی سست بلے بازی پر سوال اٹھائے گئے تھے لیکن سابق کپتان نے اپنی تنقید پر کوئی جواب نہیں دیا ہے اور انہوں نے ابھی تک یہ بھی واضح نہیں کیا ہے کہ وہ ریٹائرمنٹ کب لیں گے۔

چیف سلیکٹر ایم ایس کے پرساد نے حال ہی میں کہا تھا کہ دھونی محدود اووروں کی ٹیم میں اپنے انتخاب کو یقینی نہ سمجھیں۔ اتوار کے ٹیم کو منتخب کرنے کے لئے ممبئی میں سلیکٹرز کی میٹنگ ہونی ہے۔ پہلے یہ میٹنگ جمعہ کو ہونی تھی لیکن ہندوستانی کرکٹ کنٹرول بورڈ (بی سی سی آئی) کا انتظام دیکھنے والی منتظمین کی کمیٹی نے ایک نئے حکم میں بورڈ کے سیکرٹری کو سلیکشن کمیٹی کی میٹنگ بلانے اور اس میں حصہ لینے سے روک دیا۔

اس واقعہ کی وجہ سے میٹنگ جمعہ کی جگہ اتوار کے روز منتقل کر دی گئی۔ سلیکٹروں اور ہندوستانی کپتان وراٹ کوہلی ہفتے کی شام ملاقات کر رہے ہیں اور اس ملاقات کے دوران شاید اس دورے کی ٹیم کو حتمی شکل دے دی جائے گی۔

دھونی کے اس دورے سے الگ ہو جانے سے سلیکٹروں کا ایک مسئلہ تو ختم ہو گیا ہے لیکن دوسرا مسئلہ ان کے سامنے یہ ہے کہ ٹیسٹ ٹیم میں ردھیمان ساہا اور رشبھ پنت میں کس کا انتخاب کیا جائے۔ ساہا کندھے کی چوٹ کی وجہ سے کئی ماہ تک میدان سے باہر رہے لیکن فٹ ہو کر وہ آئی پی ایل میں کھیل چکے ہیں اور اب وہ ونڈيز دورے کے لیے اپنا دعوی پیش کریں گے۔ پنت نے ٹیسٹ ٹیم میں اپنی جگہ یقینی کرچکے ہیں لیکن ان سے پہلے ساہا ٹیسٹ ٹیم کی کیپنگ کی ذمہ داری سنبھال رہے تھے۔

ہندوستان کے سب سے کامیاب کپتان رہے دھونی کی آرمی ٹریننگ میں جانے کے ارادے سے ریٹائرمنٹ سے متعلق جاری قیاس آرائیاں دم توڑ ہو چکی ہیں۔ دھونی نے ابھی تک ایسا کوئی اشارہ نہیں دیا ہے کہ وہ مستقبل قریب میں بین الاقوامی کرکٹ سے ریٹائرمنٹ لے سکتے ہیں۔

سمجھا جا رہا تھا کہ دھونی آئی سی سی ورلڈ کپ کے بعد بین الاقوامی کرکٹ کو الوداع کہہ دیں گے، لیکن انہوں نے اس طرح کا کوئی اعلان نہیں کیا، اس کے بعد چیف سلیکٹر ایم ایس کے پرساد نے اشارہ دیئے تھے کہ اب دھونی کا ٹیم میں منتخب کیا جانا یقینی جیسا نہیں رہ گیا ہے۔