آسٹریلیا نے انگلینڈ کو 468 رنز کا دیا ہدف

ایڈیلیڈ: آسٹریلیا نے اپنی دوسری اننگ اتوار کو چوتھے دن نو وکٹ پر 230 رن پر ڈکلیئر کر دی اور انگلینڈ کو دوسرے ڈے نائٹ ایشز ٹیسٹ میں جیت کے لیے 468 رن کا مشکل ہدف دیا۔ آسٹریلیا کو پہلی اننگز میں 267 رنز کی برتری حاصل تھی۔ آسٹریلیا نے اپنی پہلی اننگز نو وکٹ پر 473 رنز پر ڈکلیئر کی تھی جبکہ انگلینڈ نے اپنی پہلی اننگز میں 236 رنز بنائے تھے۔ آسٹریلیا نے اپنے کل کے اسکور ایک وکٹ پر 45 رنز سے آگے کھیلنا شروع کیا۔ مارکس ہیرس نے 21 اور نائٹ واچ مین مائیکل نیسر نے اپنی اننگز کو دو رنز سے آگے بڑھایا۔

آسٹریلیا کا اسکور 48 رنز تک پہنچا کہ اس نے پہلے نیسر اور پھر حارث کی وکٹ گنوائی۔ نیسر نے تین اور حارث نے 23 رنز بنائے۔ جیمز اینڈرسن نے نیسر اور اسٹورٹ براڈ نے ہیرس کو پویلین بھیجا۔ کپتان اسٹیون اسمتھ چھ رنز بنانے کے بعد اولی رابنسن کا شکار بن گئے اور آسٹریلیا کا اسکور چار وکٹوں پر 55 تک ہوگیا۔

ان حالات میں مارنس لیبوشگن اور ٹریوس ہیڈ نے پانچویں وکٹ کے لیے 99 رنز کی اہم شراکت قائم کی۔ دونوں بلے بازوں نے 51-51 رنز بنائے۔ ہیڈ کی وکٹ 144 اور لابوشین کی وکٹ 173 کے اسکور پر گری۔ کیمرون گرین نے 43 گیندوں پر ناٹ آؤٹ 33 اور مچل اسٹارک نے 20 گیندوں میں 19 رنز بنا کر آسٹریلیا کو 230 تک پہنچا دیا۔

اس اسکور پر جیسے ہی رچرڈسن کی وکٹ گری آسٹریلیا نے اپنی دوسری اننگز ڈکلیئر کر دی اور انگلینڈ کے سامنے 468 رنز کا انتہائی مشکل ہدف رکھ دیا۔ انگلینڈ کی جانب سے کپتان جو روٹ، اولی رابنسن اور ڈیوڈ ملان نے دو دو جبکہ اینڈرسن اور براڈ نے ایک ایک وکٹ حاصل کی۔