ایشین گیمز: ہندوستان کی مرد کرکٹ ٹیم نے بھی جیتا گولڈ، کھلاڑیوں نے میدان پر لہرایا ترنگا

ایشین گیمز کرکٹ میں ہندوستان کی خاتون ٹیم نے کچھ دنوں پہلے ہی گولڈ میڈل حاصل کیا تھا، اور آج ہندوستان کی مرد ٹیم نے بھی گولڈ پر قبضہ کر لیا ہے۔ فائنل مقابلہ آج ہندوستان اور افغانستان کے درمیان تھا۔ ہندوستانی ٹیم بہت اچھے پوزیشن میں نظر آ رہی تھی اور 18.2 اوورس میں افغانستان نے 5 وکٹ کے نقصان پر 112 رن بنائے تھے جب زوردار بارش شروع ہو گئی۔ اس کے بعد میچ دوبارہ شروع نہیں ہو سکا اور ٹورنامنٹ میں بہترین سیڈ کی وجہ سے ہندوستان کو گولڈ میڈل مل گیا۔

فائنل مقابلے میں ٹاس ہندوستانی کپتان ریتوراج گائیکواڈ نے جیتا تھا اور پہلے گیندبازی کرنے کا فیصلہ کیا تھا۔ ہندوستانی گیندبازوں کی تعریف کرنی ہوگی جنھوں نے افغانستان کے 3 وکٹ 12 رن پر ہی گرا دیے تھے، اور پھر 52 رن پر 5 وکٹ گر گئے۔ لیکن اس کے بعد شاہداللہ اور کپتان گلبدین نائب نے نہ صرف وکٹ گرنے کا سلسلہ روکا، بلکہ رن بھی بناتے رہے۔ شاہد اللہ 43 گیندوں پر 49 رن بنا کر ناٹ آؤٹ رہے، جبکہ گلبدین نائب 24 گیندوں پر 27 رن بنا کر ناٹ آؤٹ رہے۔ ان دونوں بلے بازوں کے علاوہ صرف افسر ززئی (15 رن) ہی واحد ایسے بلے باز رہے جو دوہرے ہندسے تک پہنچ پائے۔

ہندوستان کی طرف سے روی بشنوئی نے انتہائی کفایتی گیندبازی کی۔ انھوں نے 4 اوورس میں محض 12 رن دے کر 1 وکٹ لیا۔ 1-1 وکٹ عرشدیپ سنگھ (3 اوورس میں 17 رن)، شیوم دوبے (1 اوور میں 4 رن) اور شہباز احمد (3.2 اوورس میں 28 رن) کو بھی ملے۔ واشنگٹن سندر نے 3 اوورس میں 23 رن اور سائی کشور نے 4 اوورس میں 26 رن خرچ کیے۔ 18.2 اوورس کے بعد بارش شروع ہوئی اور کھیل شروع ہونے کا امکان نظر نہیں آیا تو میچ کو ’نو ریزلٹ‘ قرار دے دیا گیا۔ ہندوستانی ٹیم سے خراب سیڈ ہونے کی وجہ سے افغانستانی ٹیم کو سلور میڈل پر اکتفا کرنا پڑا۔