ایشیا کپ 2022: ہندوستان فائنل میں پہنچے گا یا نہیں! پاکستان-افغانستان میچ پر منحصر

دبئی: ایشیا کپ 2022 کے سپر چار مقابلوں میں ہندوستان کو لگاتار دوسری ہار کا سامنا کرنا پڑا۔ پہلے پاکستان نے اسے 5 وکٹوں سے ہرایا اور اب سری لنکا نے 6 وکٹوں سے شکست دے دی۔ ہندوستان نے سری لنکا کو 174 رنوں کا ہدف دیا تھا، جسے اس نے ایک گیند باقی رہتے ہوئے حاصل کر لیا۔

پاکستان اور اب سری لنکا سے شکست کے بعد ٹیم انڈیا کا ایشیا کپ کے فائنل میں پہنچنا مشکل ہو گیا ہے۔ اب ٹیم انڈیا کو اس ٹورنامنٹ میں برقرار رہنے کے لیے پوری طرح سے دوسری ٹیموں پر انحصار کرنا ہوگا۔ بالخصوص پاکستان اور افغانستان کے میچ پر منحصر ہوگا۔ پاکستان اور افغانستان کے درمیان آج (7 ستمبر) کو میچ ہونا ہے۔ اگر پاکستان یہاں جیت جاتا ہے تو بھارت ٹورنامنٹ سے باہر ہو جائے گا اور پھر اس کا آخری میچ محض ایک رسم ادائیگی ہوگا۔

ایسے حالات میں ہندوستان فائنل میں اس صورت میں پہنچنے گا: اگر افغانستان اپنے میچ میں پاکستان کو شکست دے۔ پھر ہندوستانی ٹیم اپنے آخری میچ میں افغانستان کو شکست دے۔ دوسری طرف، سری لنکا بھی پاکستان کو ہرا دے۔ اور اس کے بعد بھی ہندوستان کا نیٹ رن ریٹ افغانستان اور پاکستان سے بہتر ہو!

اگر مگر میں پھنسی ٹیم انڈیا کی نظریں پاک-افغان میچ پر مرکوز ہیں۔ لیکن افغانستان کا پاکستان کو شکست دینا بہت مشکل نظر آتا ہے۔ افغانستان نے پاکستان کے خلاف دو ٹی-20 اور چار ون ڈے مقابلے کھیلے ہیں، جن میں اسے شکست کا منہ دیکھنا پڑا ہے۔ یعنی اگر افغانستان پاکستان کو شکست دیتا ہے تو وہ تاریخ رقم کرے گا اور اس کے ساتھ ہندوستانی ٹیم کی امیدیں بھی برقرار رہیں گی۔

ایشیا کپ 2022 کے سپر فور ٹیبل میں سری لنکا دو میچوں میں چار پوائنٹس کے ساتھ پوائنٹس ٹیبل پر سرفہرست ہے۔ دوسری جانب پاکستان کی ٹیم دو پوائنٹس کے ساتھ دوسرے نمبر پر ہے۔ پاکستان اور سری لنکا دونوں کا نیٹ رن ریٹ پلس میں ہے۔ بھارت اور افغانستان بالترتیب تیسرے اور چوتھے مقام پر ہیں۔ ہندوستان کے نیٹ رن ریٹ کی بات کریں تو یہ فی الحال منفی 0.125 ہے۔

اگر آج پاکستان کی ٹیم جیت جاتی ہے تو افغانستان اور بھارت دونوں ایشیا کپ سے باہر ہو جائیں گے۔ ایسے میں سری لنکا اور پاکستان 11 ستمبر کو ہونے والے فائنل میں مدمقابل ہوں گے۔ ویسے سری لنکا کے خلاف ٹیم انڈیا کی شکست کے بعد ایک بات تو طے ہے کہ اب 11 ستمبر کو پاک بھارت فائنل نہیں ہونے جا رہا ہے۔