ٹیسٹ کے پہلے دن بنگلہ دیش کے ارمانوں پر اشون-جڈیجہ نے پھیرا پانی، ہندوستانی ٹیم کا اسکور 34/3 سے 339/6 پہنچا دیا

ہندوستانی بلے باز روی چندرن اشون اور رویندر جڈیجہ کے درمیان ہوئی لاجواب شراکت داری کے دم پر ہندوستان نے بنگلہ دیش کے خلاف کھیلے جا رہے پہلے ٹیسٹ میچ کے پہلے دن کھیل ختم ہونے پر مضبوط پوزیشن حاصل کر لی ہے۔ خراب شروعات کے بعد ہندوستانی ٹیم کے کچھ بلے بازوں نے بنگلہ دیشی گیندبازوں کے پسینے چھڑا دیے۔ ان بلے بازوں میں ناٹ آؤٹ 102 رن بنانے والے آر اشون اور ناٹ آؤٹ 86 رن بنانے والے رویندر جڈیجہ بھی شامل ہیں۔ ان دونوں کھلاڑیوں کی ہی بدولت ایک وقت 34/3 اسکور کے ساتھ مشکل میں پھنسی ہندوستانی ٹیم پہلے دن کے آخر میں 339/6 جیسے مضبوط اسکور تک پہنچ گئی۔

آر اشون نے ٹیسٹ کیریئر کی چھٹی سنچری محض 108 گیندوں میں مکمل کی۔ یہ بہت خاص اس لیے بھی رہی کیونکہ اشون نے اپنے گھر چنئی کے چیپاک اسٹیڈیم میں یہ بہترین اننگ کھیلی۔ رویندر جڈیجہ نے ان کا بھرپور تعاون دیا اور وہ 117 گیندوں پر 86 رن بنا کر ناٹ آؤٹ ہیں۔ ان دونوں کے علاوہ سلامی بلے باز یشسوی جیسوال (118 گیندوں پر 56 رن) نے بھی نصف سنچری بنا کر ٹیم کا مشکل وقت میں بھرپور ساتھ دیا۔

پہلے دن شروعاتی دو سیشن بنگلہ دیش کے نام رہے۔ ٹیم کے کپتان نجم الحسن شانتو نے ٹاس جیتا اور پہلے گیندبازی کرنے کا فیصلہ کیا۔ شروع میں ہی ہندوستانی ٹیم مشکل مین دکھائی دینے لگی جب حسن محمود نے ہندوستان کے ٹاپ آرڈر کو تہس نہس کر دیا۔ حالانکہ پہلے یشسوی جیسوال-رشبھ پنت (52 گیندوں میں 39 رن) اور پھر آر اشون-رویندر جڈیجہ کی جوڑی نے ہندوستان کو مشکل حالات سے نکال کر ایک مضبوط پوزیشن میں پہنچا دیا۔ دن کا تیسرا سیشن پوری طرح سے ہندوستان کے نام رہا جس میں ہندوستان نے ایک بھی وکٹ بنگلہ دیشی گیندبازوں کو نہیں دیا۔

پہلے بلے بازی کرنے اتری ہندوستانی ٹیم کو روہت شرما اور وراٹ کوہلی سے بڑی اننگ کی امید تھی، لیکن مایوسی ہاتھ لگی۔ محمود نے روہت کو چھ رنوں پر آؤٹ کر ہندوستان کی شروعات خراب کر دی۔ ان کی جگہ میدان میں اترے شبھمن گل لیگ اسٹمپ سے باہر کی گیند کو وکٹ کیپر لٹن داس کے ہاتھوں میں کھیل بیٹھے۔ وہ بغیر کوئی رن بنائے پویلین لوٹ گئے۔ اس کے بعد محمود کی آف اسٹمپ کے باہر پٹکی گیند کو کوہلی نے اس طرح کھیلا کہ بلے کا باہری کنارہ لے کر گیند سلپ میں چلی گئی۔ کوہلی محض چھ رن بنا سکے۔

دوسرے سلامی بلے باز جیسوال وکٹ پر جم کر کھیلتے رہے اور پھر ان کا ساتھ دیا وکٹ کیپر بلے باز رشبھ پنت نے۔ دونوں نے مل کر 62 رنوں کی شراکت داری کی، اور پھر پنت ایک کمزور شاٹ کھیل کر آؤٹ ہو گئے۔ پھر جیسوال بھی زیادہ دیر تک بلے بازی نہیں کر سکے اور ناہید رانا کا شکار بن گئے۔ کے ایل راہل نے بھی مایوس کیا جو مہدی حسن میراز کی گیند پر محض 16 رن بنا کر آؤٹ ہو گئے۔

یہاں سے اشون اور جڈیجہ کی جادوئی بلے بازی شروع ہوئی جس نے بنگلہ دیشی گیندبازوں کے دانت کھٹے کر دیے۔ دوسرے سیشن کا کھیل ختم ہونے تک ہندوستان نے 6 وکٹ کے نقصان پر 176 رن بنائے تھے۔ تیسرے سیشن میں اشون اور جڈیجہ نے بنگلہ دیش کو ایک بھی کامیابی حاصل نہیں کرنے دی۔ تیسرے سیشن کے دوران 32 اوورس میں تقریباً 5 کی اوسط سے 163 رن بنے۔ اس درمیان اشون نے ایک بڑا عالمی ریکارڈ اپنے نام کر لیا۔ وہ ٹیسٹ کرکٹ میں 500 وکٹ اور 20 مرتبہ 50 سے زیادہ اسکور کرنے والے دنیا کے پہلے کھلاڑی بن گئے ہیں۔

بنگلہ دیش کی طرف سے حسن محمود نے 18 اوورس میں 58 رن دے کر 4 کھلاڑیوں کو آؤٹ کیا، جبکہ ناہید رانا اور مہدی حسن میراز کو 1-1 وکٹ ملے۔ شکیب الحسن بہت مہنگے ثابت ہوئے جنھوں نے 8 اوورس میں 50 رن خرچ کیے اور انھیں کوئی وکٹ بھی حاصل نہیں ہوا۔