ہندوستان-پاکستان میچ کے لیے احمد آباد کے تمام ہوٹل ہاؤس فل، اسپتال کے بستر بک کرا رہے شائقین!

احمد آباد: نریندر مودی اسٹیڈیم میں 15 اکتوبر کو ہونے والے ہندوستان اور پاکستان کے ورلڈ کپ کے مقابلے کا بے صبری سے انتظار کرنے والے شائقین کو ایک حیران کن چیلنج کا سامنا ہے۔ شہر کے تقریباً تمام ہوٹل مکمل طور پر بک ہو چکے ہیں اور دستیاب چند کمروں کی قیمت اتنی زیادہ ہے کہ عام لوگ متبادل کی تلاش میں ہیں۔

خیال رہے کہ آئی سی سی کرکٹ ورلڈ کپ کے شیڈول کے اعلان کے بعد احمد آباد میں ہوٹل کی قیمتیں میچ کے دن کے ارد گرد ڈرامائی طور پر آسمان پر پہنچ گئیں، جس سے بہت سے شائقین کو سستی رہائش تلاش کرنے میں مشکلات کا سامنا کرنا پڑا۔

احمد آباد میں ہوٹل کے کمرے پہلے ہی پوری طرح بک چکے ہیں، جن کی قیمتیں 1.5 لاکھ روپے سے زیادہ ہیں۔ اس سے کرکٹ کے شائقین کے لیے کرکٹ کے مہاکمب کے دوران یہاں ٹھہرنے کے لیے جگہ تلاش کرنا انتہائی مشکل ہو گیا ہے اور اب ان کے پاس محدود آپشن رہ گئے ہیں۔

کچھ شائقین نے حیرت انگیز چیلنج سے نمٹنے کا حیرت انگیز طریقہ تلاش کیا ہے۔ کرکٹ کمنٹیٹر مفضل ووہرا نے سوشل میڈیا پر ایک دلچسپ رجحان کی نشاندہی کی۔ انہوں نے بتایا کچھ شائقین نے احمد آباد میں رہائش کے لیے اسپتال کے بستر کو بک کرنا بہتر سمجھا ہے!

جیسے جیسے شہر اس کرکٹ میچ کی میزبانی کے لیے تیار ہو رہا ہے، جس کا لوگوں کو بےصبری سے انتظار ہے، ہندوستان-پاکستان میچ کی تاریخ کے آس پاس بیڈ کی بکنگ میں غیر معمولی اضافہ نظر آ رہا ہے۔

ہوٹل کے کمروں کی مہنگائی صرف احمد آباد تک محدود نہیں ہے۔ پڑوسی شہروں کے ہوٹلوں کے نرخوں میں بھی ہوشربا اضافہ دیکھنے میں آیا ہے۔ احمد آباد سے صرف ایک گھنٹہ کی مسافت پر واقع وڈودرا میں ہوٹل کی بکنگ کے کرایے معمول کے نرخوں سے 6 سے 7 گنا بڑھ گئے ہیں۔