دوسرا ٹی-20: بابر اور رضوان کے سامنے انگلینڈ پست، پاکستان 10 وکٹوں سے فتح یاب

کراچی: بابر اعظم (110) اور محمد رضوان (88) کے درمیان 203 رن کی شراکت کی بدولت پاکستان نے جمعرات کو دوسرے ٹی ٹوئنٹی میں انگلینڈ کو 10 وکٹوں سے شکست دے دی۔ انگلینڈ نے پہلے بیٹنگ کرتے ہوئے پاکستان کو 20 اووروں میں 200 رن کا ہدف دیا تھا جسے بابر کی ٹیم نے تین گیندیں باقی رہتے حاصل کر لیا۔

یہ بابر اور رضوان کی ساتویں سنچری اور پہلی ڈبل سنچری ہے۔ ٹی ٹوئنٹی انٹرنیشنل میں ہدف کا تعاقب کرتے ہوئے یہ سب سے بڑی شراکت داری بھی ہے۔ اس سے قبل بابر رضوان نے جنوبی افریقہ کے خلاف پہلی وکٹ کے لیے 197 رن کی شراکت کرکے یہ ریکارڈ بنایا تھا۔ بابر نے ناقدین کو خاموش کرتے ہوئے 66 گیندوں پر 11 چوکوں اور پانچ چھکوں کی مدد سے ناٹ آوٹ 110 رن بنا ئے، جبکہ رضوان نے 51 گیندوں پر پانچ چوکوں اور چار چھکوں کی مدد سے ناٹ آوٹ 81 رن بنائے۔

200 رن کے تعاقب میں بابر اور رضوان نے پاکستان کو دھماکہ خیز آغاز فراہم کیا۔ بابر نے اپنا ہاتھ کھولنے میں وقت لیا لیکن رضوان پہلی گیند سے ہی حملہ آور تھے اور پاور پلے میں پاکستان نے 59 رن جوڑے۔ ساتویں اوور میں رضوان کو بھی لائف لائن ملی جب فلپ سالٹ عادل رشید کی گیند پر اسٹمپنگ سے چوک گئے۔ جب پاکستان کو آخری آٹھ اووروں میں 96 رن درکار تھے تو دونوں نے معین علی کے 13ویں اوور میں 21 رن جوڑ کر جارحیت کی سطح کو بڑھا دیا۔

سیم کرن نے 18ویں اوور میں صرف چار رن بنا کر پاکستان پر دباؤ ڈالنے کی کوشش کی لیکن پاکستان نے لیوک ووڈ کے 19ویں اوور میں 17 رن جوڑ کر غیر رسمی طور پر میچ ختم کردیا۔ رضوان نے 20ویں اوور کی تیسری گیند پر چوکا لگا کر سات میچوں کی سیریز 1-1 سے برابر کر دی۔ سیریز کا تیسرا میچ جمعہ کو نیشنل اسٹیڈیم کراچی میں کھیلا جائے گا۔

اس سے قبل انگلینڈ نے ٹاس جیت کر بیٹنگ کرتے ہوئے جارحانہ آغاز کیا اور پاور پلے میں فلپ سالٹ (26) اور ڈیوڈ ملان (صفر) کی وکٹیں گنوانے کے باوجود 48 رن جوڑے۔ شاہنواز دہانی نے مسلسل دو گیندوں پر ہیلز اور ملان کو آؤٹ کر کے انگلینڈ کی اننگز کو لگام دینے کی کوشش کی لیکن چوتھے نمبر پر بیٹنگ کے لیے آنے والے ڈکٹ نے ایسا نہیں ہونے دیا۔ ڈکٹ نے 22 گیندوں پر سات چوکوں کی مدد سے 43 رن بنائے۔ ان کا ساتھ دیتے ہوئے اوپنر فلپ سالٹ نے بھی 30 (27) رن جوڑے۔

ان دونوں کے آؤٹ ہونے کے بعد ہیری بروک اور معین علی نے پانچویں وکٹ کے لیے 27 گیندوں پر 59 رن کی شراکت داری کی۔ بروک 19 گیندوں پر 31 رن بنانے کے بعد پویلین لوٹ گئے تاہم معین نے اپنی نصف سنچری مکمل کرتے ہوئے 23 گیندوں پر چار چوکوں اور چار چھکوں کی مدد سے 55 رن بنائے۔ انگلینڈ نے 20 اووروں میں آخری پانچ اووروں میں 66 رن جوڑ کر 199 رن بنائے۔ پاکستان کی جانب سے دہانی اور حارث رؤف نے دو دو جبکہ محمد نواز نے ایک وکٹ حاصل کی۔