یشونت سنہا نے مودی کا موازنہ ’پاگل بادشاہ‘ سے کیا!

نئی دہلی: سابق وزیر خزانہ اور بھارتیہ جنتا پارٹی کے سینئر لیڈر یشونت سنہا نے وزیراعظم پر بالواسطہ طورپر حملہ کرتے ہوئے دعوی کیا کہ نوٹوں کی منسوخی کا کوئی بھی ’اعلان شدہ مقصد‘حاصل نہیں ہوسکا ہے اور اس سے الٹی ’ٹیکس دہشت گردی‘ بڑھی ہے۔

انہوں نے مودی کا نام لئے بغیر یہ بھی کہا کہ اس حکومت میں صرف ایک ہی شخص پالیسیاں بناتا ہے اور نوٹوں کی منسوخی سے پہلے کسی کو بھی اعتماد میں نہیں لیا گیا۔ انہوں نے کہا کہ اس حکومت میں کئی پالیسی ساز نہیں ہیں یہاں ایک ہی شخص پالیسیاں بناتا ہے۔
معروف ماہر اقتصادیات اور جواہر لال نہرو یونیورسٹی سے ریٹائرڈ پروفیسر ارون کمار کی کتاب ’ڈی مونیٹائزیشن اینڈ دی بلیک منی‘ کے اجرا کے موقع پر سنہا نے مودی اور دہلی سلطنت کے حکمراں محمد بن تغلق کا نام لئے بغیر ان کا موازنہ کرتے ہوئے کہا کہ اس سے پہلے پانچ سو برس قبل ایک حکمراں کو دہلی سے راجدھانی دولت آباد اور پھر واپس دہلی منتقل کرنے کے لئے یاد کیا جاتا ہے۔ لیکن اس نے ایک کام اور کیا تھا۔ اس نے بھی چل رہی کرنسی کو پوری طرح تبدیل کردیا تھا۔

طویل عرصہ سے مودی حکومت کی سخت تنقید کرنے والے سابق وزیر خزانہ نے کہاکہ نوٹوں کی منسوخی کے اعلان کے وقت 8 نومبر 2016 کو حکومت نے اس کے جتنے مقاصد بتائے تھے ان میں سے ایک بھی حاصل نہیں کیا جاسکا۔ انہوں نے کہاکہ نہ تو بدعنوانی، نہ ہی بلیک منی ختم ہوئی ہے اور نہ ہی دہشت گردی میں کوئی کمی آئی ہے۔ انہوں نے کہاکہ کچھ حد تک معیشت کا ڈیجیٹلائزیشن ضرور بڑھا ہے لیکن اسے نوٹوں کی منسوخی کے مقاصد میں بعد میں شا مل کیا گیا تھا۔

ایک سوال کے جواب میں انہوں نے کہاکہ اگر مجھ سے پوچھا جاتا تو میں یہ کہتا کہ یہ قدم نہیں اٹھایئے۔ یہ ناکام ہوجائے گا۔ انہوں نے کہاکہ 17مہینہ کے بعد یہ نتیجہ ہے کہ ایک اقتصادی قدم کے طورپر نوٹوں کی منسوخی بالکل ناکام ہوچکی ہے۔

(یو این آئی ان پٹ کے ساتھ)