بھگوڑے نیرو مودی کے بنگلے کا انہدام شروع، جس میں لٹکتے تھے ہیرے

ممبئی: پنجاب نیشنل بینک گھوٹالہ کے مفرور ملزم نیرومودی کے ممبئی سے متصل رائے گڑھ ضلع میں ساحل پر واقع بنگلہ کو منہدم کرنے کی کارروائی شروع کر دی گئی ہے۔ علی باغ کی ایس ڈی او شاردا پوار نے کہا کہ جمعہ کی سہ پہر سے انہدامی دستہ کے عملے نے کارروائی شروع کی ہے اور اس کے مکمل انہدام میں ایک ہفتہ لگ جائے گا، بنگلہ کھیم ساحل پر واقع ہے۔

سرکاری ریکارڈ کے مطابق بنگلہ کا رقبہ 33ہزار مربع فٹ ہے لیکن آراستہ اور سہولتوں کے ساتھ بنگلہ 70ہزار مربع فٹ پر مشتمل بتایا جارہا ہے، ڈارئیووے کے ساتھ ساتھ جدید ترین میٹل فینسنگ اور بڑا حفاظتی دروازہ لگا ہوا ہے۔ بنگلہ 2009-2010 میں تعمیر کیا گیا، جہاں نیرومودی کی جانب سے پارٹیاں منعقد کی جاتی تھیں، مودی پنجاب نیشنل بینک کے 13,500 کروڑ روپے کے بینک گھوٹالہ میں ملوث ہے، گھوٹالہ صارفین، عالمی تجارتی پارٹنر، دوستوں اور اہل خانہ کے ذریعہ کیا گیا۔

بمبئی ہائی کورٹ میں ایک این جی او شام برجے یووا کرانتی (ایس وائی کے) کے ذریعہ دائر ایک مفاد عامہ عرضداشت پر جاری حکم کے بعد بنگلہ، ہوٹل اور ریسورٹ کو منہدم کرنے کا سلسلہ جاری ہے۔ جنہوں نے اضافی تعمیر اور دیگر ساحلی قوانین اور ضوابط کی خلاف ورزی کی ہے۔ ایس وائی کے ریاستی چیف سریندردھوالے نے کہا کہ چند ہفتوں میں 10 بنگلوں کو منہدم کردیا گیا ہے اور کلکٹر کی فہرست میں مزید دو درجن بنگلہ شامل ہیں۔ مودی کے بنگلہ کی قیمت 13 کروڑ روپے بتائی جاتی ہے، لیکن دھوالے کے مطابق بنگلے کی بازار میں قیمت 100 کروڑ روپے سے تجاوز کرگئی ہے۔

ریاستی وزیر برائے جنگلات رام داس کدم کے مطابق ساحلی علاقوں می تقریباً151غیر قانونی ڈھانچے موجود ہیں جبکہ 121 بنگلہ علی باغ میں واقع ہیں۔ فی الحال 10بنگلہ توڑ دیئے گئے ہیں اور مزید 4 ڈھانچوں کو نشانہ بنایا جائے گا۔