دہلی میں ٹم کک کے ہاتھوں ایپل اسٹور کا افتتاح، لمبی قطاروں اور تالیوں کی گڑگڑاہٹ کے درمیان شروعات

نئی دہلی: ایپل کے سی ای او ٹم کک نے آج دہلی میں کمپنی کے اسٹور کا افتتاح کر دیا۔ یہ دہلی کا پہلا اور ملک کا دوسرا ایپل اسٹور ہے۔ اسٹور کھلنے سے پہلے سینکڑوں لوگ وہاں پہنچ گئے تھے اور افتتاحی تقریب کے گواہ بنے۔ ایپل اسٹور کے افتتاح پر لوگوں میں خوشی کی لہر دیکھی گئی۔ اس موقع پر ٹم کک نے عوام کو مبارکباد دی۔

لوگوں کا ہجوم ٹم کک کے ساتھ سیلفیاں لے رہا تھا اور ٹم کک نے بھی صارفین کا پرتپاک استقبال کیا۔ کچھ والدین اپنے بچوں کے ساتھ پہنچ گئے تھے۔ کچھ لوگوں نے بتایا کہ وہ بدھ کے روز بھی دکان دیکھنے آئے تھے۔ ایپل اسٹور کے افتتاح کے موقع پر گڑگاؤں، نوئیڈا، غازی آباد سے لوگ پہنچے اور ان لوگوں میں اسٹور کو لے کر کافی جوش و خروش دیکھا گیا۔

صبح سب سے پہلے ٹم کک شو روم پہنچے اور اپنے ملازمین سے ملاقات کی۔ یہ اسٹور سلیکٹ سٹی مال، ساکیت میں کھولا گیا ہے۔ ٹم کک تقریب میں شرکت کے لیے بدھ کو ہی دہلی پہنچ گئے تھے۔ ایپل نے ہندوستان میں لسانی تنوع کو دیکھتے ہوئے اپنے اسٹورز پر خصوصی انتظامات کیے ہیں۔ دہلی کے ساکیت اسٹور میں 18 ریاستوں کے 70 سے زیادہ ملازمین ہیں جو 15 سے زیادہ زبانیں بول سکتے ہیں۔

ایپل اسٹور کا مقصد ایپل کی مصنوعات براہ راست فروخت کرنا، ان کی خدمات اور دیگر لوازمات کو دہلی اور آس پاس کے علاقوں اور ریاستوں کے لوگوں کو براہ راست دستیاب کرانا ہے۔ سینئر نائب صدر (ریٹیل) ایپل ڈیرڈرے اوبرائن نے کہا ’’ہم دہلی میں اپنے صارفین کے لیے ایپل کی بہترین مصنوعات لانے کے لیے بہت پرجوش ہیں۔‘‘

ساکیت میں ایپل اسٹور ممبئی میں ایپل بی کے سی اسٹور سے تھوڑا چھوٹا ہے۔ ایپل کے اسٹور کی بیرونی شکل چمکدار رنگوں میں ڈیزائن کی گئی ہے۔ یہاں کا داخلہ دہلی کے قلعے کے دروازوں سے ملتا جلتا نظر آتا ہے۔ اس سے قبل ہندوستان میں کمپنی کا پہلا اسٹور ممبئی کے بی کے سی میں کھولا گیا تھا۔ ممبئی میں اسٹور کو 133 ماہ کی لیز پر 42 لاکھ روپے ماہانہ کرایہ پر لیا گیا ہے، جسے مزید 60 ماہ تک بڑھایا جا سکتا ہے۔

قبل ازیں، ٹم کک نے بدھ کی شام وزیر اعظم نریندر مودی سے ملاقات کی۔ ملاقات کے بعد ٹم کک نے ٹوئٹ کرتے ہوئے کہا ’’پرتپاک استقبال کے لیے وزیراعظم مودی کا شکریہ۔ ہم ہندوستان کے مستقبل پر ٹیکنالوجی کے مثبت اثرات کے بارے میں آپ کے وژن کا اشتراک کرتے ہیں۔‘‘ وہیں، وزیر اعطم مودی نے بھی ٹوئٹ کیا ’’ٹم کک سے مل کر خوشی ہوئی۔ بہت سے موضوعات پر خیالات کا تبادلہ کرنا بہت اچھا تجربہ تھا۔‘‘