رول مادل کا حال: مودی کے گجرات میں بے روزگاری کی شرح سب سے تیز

ملک میں گزشتہ کچھ سالوں میں بے روزگاری کی شرح میں بے تحاشہ اضافہ درج کیا گیا ہے۔ این ایس ایس او کے تازہ سروے کے مطابق ملک کی 11 ریاستوں میں پورے ملک کی اوسط بے روزگاری شرح سے زیادہ بے روزگاری ہے۔ ہریانہ، جھارکھنڈ، کیرالہ، اڈیشہ، اتراکھنڈ اور بہار میں بے روزگاری کی شرح 18-2017 کی اوسط قومی بے روزگاری شرح سے بھی زیادہ ہے۔

این ایس ایس او کے اعداد و شمار کے مطابق 12-2011 میں بھی ہریانہ، آسام، جھارکھنڈ، کیرالہ، اڈیشہ، اتراکھنڈ اور بہار میں قومی بے روزگاری شرح سے زیادہ بے روزگاری تھی جب کہ پنجاب، تمل ناڈو، تلنگانہ اور اتر پردیش اس فہرست میں نئی نئی جڑنے والی ریاستیں ہیں۔

بزنس اسٹینڈرڈ کی ایک رپورٹ میں کہا گیا ہے کہ سب سے زیادہ بے روزگاری کیرالہ میں ہے۔ 18-2017 میں یہاں بے روزگاری شرح 11.4 فیصد درج کی گئی جب کہ 12-2011 میں یہ 6.1 فیصد تھا۔ ہریانہ میں 18-2017 میں بے روزگاری شرح 8.6 فیصد درج کی گئی جب کہ 12-2011 میں یہ 2.8 فیصد تھی۔

پی ایم مودی کی رول ماڈل ریاست گجرات میں بے روزگاری کی شرح سب سے زیادہ تیز رفتاری کے ساتھ بڑھی ہے۔ یہاں 12-2011 میں بے روزگاری شرح صرف 0.5 فیصد تھی۔ 18-2017 میں یہ شرح بڑھ کر 4.8 فیصد ہو گئی ہے۔ گجرات میں نوجوانوں میں بے روزگاری شرح سب سے زیادہ بڑھی ہے۔ گجرات کے دیہی علاقوں میں 12-2011 میں بے روزگار شرح صرف 0.8 فیصد تھی، لیکن 18-2017 میں یہ بڑھ کر 14.9 فیصد ہو گئی۔ شہری علاقوں میں بھی بے روزگاری شرح میں کئی گنا اضافہ ہوا ہے۔ شہری علاقوں میں 12-2011 میں بے روزگاری شرح 2.1 فیصد تھی، لیکن 18-2017 میں یہ شرح بڑھ کر 10.7 فیصد ہو گئی۔

واضح رہے کہ مودی حکومت پر روزگار کے ایشو پر ناکام رہنے کے الزامات لگتے رہے ہیں۔ اپوزیشن پارٹیاں بھی اس ایشو پر حکومت کو گھیرتی رہی ہیں۔ ایسے میں یہ رپورٹ حکومت کے لیے کسی جھٹکے سے کم نہیں ہے۔