نیرو مودی کی عدالتی حراست 19 ستمبر تک بڑھی

لندن: پنجاب نیشنل بینک (پی این بی) کے ساتھ ساڑھے تیرہ ہزار کروڑ روپے کے گھوٹالے اور منی لانڈرنگ معاملے کے ملزم ہندوستان میں مطلوب ہیروں کے تاجر نیرو مودی کو راحت نہیں ملی۔ برطانیہ کی ویسٹ منسٹر عدالت نے اس کی عدالتی حراست کی مدت 19ستمبر تک بڑھا دی ہے۔

ویسٹ منسٹر کی عدالت میں نیرو مودی کے معاملے میں وانڈسورتھ جیل سے ویڈیو لنک کے ذریعہ سے تھوڑی دیر سماعت ہوئی۔ جسٹس ٹی اکرا م نے نیرو کی عدالتی حراست کو 19ستمبر تک کے لئے بڑھا دیا۔

نیرو مودی کو پی این بی کے ساتھ گھوٹالے اور منی لانڈرنگ معاملے میں اس سال مارچ میں گرفتار کیا گیا تھا۔ اسے لندن کے جنوب، مغرب میں واقع وانڈسورتھ جیل میں رکھا گیا ہے۔ جولائی میں برطانیہ کے ہائی کورٹ نے اس کی ضمانت عرضی خارج کردی تھی۔ جولائی میں نیرو کی حراست کی مدت کو 22 اگست تک بڑھا دیا گیا تھا۔

گزشتہ سماعت کے دوران اہم جج ایما اربتھ ناٹ نے اشارہ دیا تھا کہ دنوں فریقین نیرو مودی کی ہندوستان حوالگی پر متفق ہو سکتے ہیں۔

پی این بی کا گھپلہ پچھلے سال فروری میں سامنے آیا تھا اس کے بعد سے ہی 48 سالہ نیرو مودی فرار ہوگیا تھا۔ اسے لندن میں گرفتار کیا گیا تھا۔ ہندوستان میں نیرو مودی کی کئی کروڑ روپے کی جائیداد ضبط کی جاچکی ہے۔