نیا گھوٹالہ: 17 بینکوں سے 35 ہزار کروڑ روپے کی دھوکہ دہی! کانگریس پارٹی کا مودی حکومت پر حملہ

نئی دہلی: کانگریس نے کہا ہے کہ مودی حکومت میں بینکوں کو مسلسل لوٹا جا رہا ہے اور اب ایک نیا گھپلہ سامنے آیا ہے جس میں ڈی ایچ ایل ایف کے مالکان نے ملک کے 17 بینکوں کو 35000 کروڑ روپے کا دھوکہ دیا ہے۔

کانگریس کی ترجمان سپریہ شری نیت نے ہفتہ کو یہاں پارٹی ہیڈکوارٹر میں ایک پریس کانفرنس میں بتایا کہ ڈی ایچ ایل ایف نے بینکوں کو 34615 کروڑ روپے کا دھوکہ دیا ہے، جو ملک میں اب تک کا سب سے بڑا بینکنگ گھپلہ ہے۔ انہوں نے کہا کہ مودی حکومت میں 2014 سے مسلسل گھپلے ہو رہے ہیں اور گھپلے کرنے والوں کو سزا دینے کے بجائے انہیں ملک سے بھاگنے کا پورا موقع دیا جا رہا ہے۔

انہوں نے کہا کہ ڈی ایچ ایف ایل نے 2010 اور 2018 کے درمیان بینکوں کے کنسورشیم سے 42871 کروڑ روپے کا قرض لیا اور 2019 سے اسے ادا کرنے کے بجائے ڈیفالٹ کرنا شروع کر دیا۔ اس کی تصدیق یکم اپریل 2015 سے 31 مارچ 2019 کے درمیان کیے گئے جائزہ آڈٹ سے ہوئی ہے، جس میں کہا گیا ہے کہ کپل اور دنیش وادھاون نے ذاتی اثاثے بنانے کے لیے رقم کا استعمال کیا۔

ترجمان نے کہا کہ یہ حیرت کی بات ہے کہ ودھاون نے پردھان منتری آواس یوجنا میں بھی گھپلہ کیا ہے اور اس معاملے میں انہوں نے ہوم لون کھاتوں سے سبسڈی کے طور پر 1887 کروڑ روپے کا منافع کمایا ہے۔ یہ گھپلہ 2020 میں یس بینک گھپلہ کی تحقیقات کے دوران ہی سامنے آیا تھا لیکن اس وقت اس گھپلے کے بارے میں خاموشی قائم رکھی گئی۔

انہوں نے الزام لگایا کہ اس سے زیادہ حیران کن بات یہ ہے کہ بھارتیہ جنتا پارٹی کو ان گھپلوں سے تقریباً 28 کروڑ روپے چندہ کے طور پر ملے ہیں۔ انہوں نے کہا کہ حکومت ان جعلسازون کو سزا دینے کے لیے کیا اقدامات کر رہی ہے اس کا انکشاف ہونا چاہیے۔