ایل پی جی سلنڈر ایک سال میں 100 روپے مہنگا، سبسڈی صفر رہ گئی !

نئی دہلی: ایل پی جی سلنڈرپر گذشتہ ایک سال میں سبسڈی میں مسلسل کمی کی وجہ سے اس عرصے کے دوران سبسڈی والا سلنڈر 100 روپے مہنگا ہوگیا اورسبسڈی صفر رہ گئی۔

گذشتہ سال جولائی میں قومی دارالحکومت دہلی میں 14.2 کلووالا ایل پی جی سیلنڈر کی مارکیٹ قیمت یعنی غیر سبسڈی والے سلنڈر کی قیمت 637 روپے تھی جو اب گھٹ کر 594 روپے ہوگئی ہے۔ اس کے باوجود اس عرصے کے دوران سبسڈی والا سلنڈر 100 روپے مہنگا ہوگیا اور اس کی قیمت 494.35 روپے سے بڑھ کر 594 روپے ہوگئی۔

حکومت کی جانب سے سبسڈی میں بار بار کٹوتی کی وجہ سے اس سال مئی سے سبسڈی اورغیر سبسڈی والے ایل پی جی سلنڈر ایک جیسے ہوگئے ہیں۔ اس سال مئی ، جون اور جولائی میں ، صارفین کو کوئی سبسڈی نہیں ملی ہے۔

مودی سرکار کی پہلی مدت کے دوران یہ اطلاعات موصول ہورہی تھیں کہ حکومت آہستہ آہستہ ایل پی جی سلنڈروں پر سبسڈی ختم کرنے کا ارادہ رکھتی ہے۔ پٹرولیم اور قدرتی گیس کے وزیر دھرمیندر پردھان سے جب بھی اس سلسلہ میں پوچھا گیا تووہ اس سے انکار کرتے رہے ۔

دوسری طرف حکومت نے گزشتہ ایک سال میں سبسڈی میں مسلسل کمی کی ہے۔ جولائی 2019 میں سبسڈی والے ایل پی جی سلنڈر 494.35 روپے اور سبسڈی والا سلنڈر 637 روپے کا تھا۔ اکتوبر 2019 میں سبسڈی والا 517.95 روپے اور غیر سبسڈی والا سلنڈر 605 روپے کا ہوگیا ۔ اس سال جنوری میں سبسڈی والے سلنڈر کی قیمت بڑھ کر 535.14 روپے اور غیر سبسڈی والے سلنڈر کی قیمت 714 روپے ہوگئی۔ اپریل میں ، سبسڈی والے سلنڈر کی قیمت بڑھ کر 581.57 روپے اور غیر سبسڈی کی قیمت 744 روپے ہوگئی۔

اپریل میں بین الاقوامی منڈی میں ایل پی جی کی قیمتوں میں زبردست کمی کے بعد گھریلو سلنڈروں کی مارکیٹ قیمت مئی میں 162.50 روپے سے گھٹ کر 581.50 روپے ہوگئی جس سے سبسڈی اورغیر سبسڈی والے سلنڈروں کی قیمت ایک ہوگئی۔ جون اور جولائی میں سبسڈی والے سلنڈروں کی قیمت میں غیر سبسڈی والے سلنڈروں کے ساتھ یکساں اضافہ کیا گیا ہے۔

ملک کی سب سے بڑی آئل مارکیٹنگ کمپنی انڈین آئل کارپوریشن نے اپنی ویب سائٹ پر سبسڈی والے سلنڈروں کی قیمت کے بارے میں معلومات دینا بند کردیا ہے۔ ایک سال قبل تک ان کی ویب سائٹ پر معلومات دستیاب ہوتی تھیں۔ گزشتہ سال جنوری سے اب تک سبسڈی والے سلنڈروں کی قیمتوں میں اضافے کی وجہ جاننے کے لئے سرکاری شعبہ کی کمپنی کو 7 جولائی کو بھیجے گئے ای میل کا کوئی جواب نہیں ملا ہے۔