ایران-اسرائیل جنگ کا اثر: شیئر بازار میں آئی زبردست گراوٹ، امبانی-اڈانی کو بھی لگا جھٹکا

 ایران اور اسرائیل کے درمیان جاری جنگ کا اثر گزشتہ کاروباری دن جمعرات کو ہندوستانی شیئر بازار پر بھی دیکھنے کو ملا جس کے تحت سینسیکس اور نفٹی میں بڑی گراوٹ آئی تھی۔ ایک طرف جہاں سینسیکس 1770 پوائنٹس کے ساتھ ٹوٹ کر بند ہوا تھا تو وہیں نفٹی میں 546 پوائنٹس کی کمی آئی تھی۔ اس درمیان مکیش امبانی کی ریلائنس سے لے کر اڈانی گروپ کی کمپنیوں کے شیئروں میں بھی بڑی گراوٹ دیکھنے کو ملی۔

کمپنی کے شیئروں میں آئی گراوٹ کا اثر امیروں کی فہرست میں مکیش امبانی اور گوتم اڈانی کی رینکنگ پر بھی پڑا ہے۔ بازار میں آئی گراوٹ کے درمیان مکیش امبانی کی کمپنی ریلائنس انڈسٹریز کا شیئر بُری طرح ٹوٹ گیا اور یہ 3.95 فیصد کی گراوٹ لے کر 2813.95 کی سطح پر بند ہوا۔ شیئر ٹوٹنے سے ریلائنس کا مارکیٹ کیپ بھی گھٹ کر 19.05 لاکھ کروڑ روپے رہ گیا۔ اس کا اثر مکیش امبانی کی نیٹ ورتھ پر بھی دیکھنے کو ملا۔

بلومبرگ بلینیئرس انڈیکس کے مطابق ریلائنس چیئرمین کی نیٹ ورتھ میں گزشتہ 24 گھنٹے میں ہی 4.29 ارب ڈالر یا قریب 36000 کروڑ روپے کی کمی آئی ہے۔ اس ہفتہ لگاتار دوسری بار تھا جبکہ ریلائنس شیئر پھسلا ہے۔ مکیش امبانی کی نیٹ ورتھ میں آئی اس کمی کا اثر ان کی رینکنگ پر بھی پڑا ہے۔ دراصل 36 ہزار کروڑ روپے سے زیادہ کی کمی کے بعد اب مکیش امبانی کی کُل جائیداد گھٹ کر 107 ارب ڈالر رہ گئی ہے اور اس اعداد و شمار کے ساتھ دنیا کے ٹاپ ارب پتیوں کی فہرست میں وہ دو پائیدان نیچے آ گئے ہیں۔ امیروں کی فہرست میں اب مکیش امبانی 14ویں سب سے امیر انسان ہیں۔

ریلائنس کے ساتھ ہی شیئر بازار کی سُنامی میں اڈانی گروپ کی بازار میں لسٹڈ کمپنیوں کے شیئر بھی بُری طرح بکھرتے ہوئے نظر آئے۔ انرجی شیئر 4.09 فیصد پھسل کر 1807.80 روپے پر بند ہوا جبکہ اڈانی پورٹ کے اسٹاک میں قریب 3 فیصد کی گراوٹ آئی اور یہ 1426.05 روپے پر بند ہوا۔ شیئروں میں آئی کمی کے سبب گوتم اڈانی کی نیٹ ورتھ میں 2.93 ارب ڈالر یا قریب 24,600 کروڑ روپے کا خسارہ ہوا اور یہ 100 ارب ڈالر سے نیچے پہنچ گئی۔ گوتم اڈانی اب امیروں کی فہرست میں 14ویں پائیدان سے کھسک کر 17ویں نمبر پر پہنچ گئے ہیں۔