سونے کی قیمت پہلی مرتبہ 40 ہزار روپے فی تولہ سے پار!

نئی دہلی: عالمی اقتصادی بحران اور مندی کا خدشہ بڑھنے کی تشویش کے درمیان سرمایہ داروں کی بھاری مانگ کی وجہ سے دہلی کے سرافہ بازار میں سونا پہلی مرتبہ 40 ہزار روپے فی دس گرام (تولہ) کی ریکارڈ سطح پر پہنچ گیا ہے۔ واضح رہے کہ جمعرات کے روز سونے میں 250 روپے فی دس گرام کا اضافہ درج کیا گیا اور وہ اپنی بلند ترین سطح پر پہنچ گیا۔

حالانکہ جمعہ کے روز کچھ تنزلی کے ساتھ سونے کی قیمت 39830 روپے فی تولہ ہو گئی، تاہم اس کے پھر سے بڑھنے کے پورے آثار ہیں۔ قبل ازیں بدھ کے روز سونا 300 روپے کی تیزی کے ساتھ 39970 روپے فی دس گرام پر بند ہوا تھا۔

مضبوط عالمی رخ کے درمیان صنعتی اکائیوں اور سکہ مینوفیکچررس کی مضبوط مانگ آنے سے چاندی کی قیمت بھی 200 روپے کے اضافہ کے ساتھ 50 ہزار کی سطح کے قریب پہنچی اور 49050 روپے فی کلو گرام پر بند ہوئی۔ جمعہ کے روز چاندی کی قیمت میں بھی کچھ کمی آئی اور وہ اس کی قیمت آج 48500 روپے فی کلو گرام ہے۔

غورطلب ہے کہ تہواروں کا موسم آنے سے قبل زیورات کے کاروباریوں کی خریداری بڑھنے کی وجہ سے بیش قیمتی دھاتوں کی قیمت میں تیزی آئی ہے۔ مندی کے خدشہ کی وجہ سے سرمایہ دار محفوظ سرمایہ داری کے متبادل تلاش کر رہے ہیں اور انہوں نے سرفہ بازار کی طرف رخ کیا ہے۔

عالمی سطح پر نیو یارک میں سونے کی قیمت تیزی کے ساتھ 1539 ڈالر فی اونس رہی جبکہ چاندی کی قیمت 1.15 فیصد کی تیزی کے ساتھ 18.63 ڈالر فی اونس رہی۔ اس کے علاوہ ہندوستان میں روپے کے کمزور ہونے کی وجہ سے بھی بیش قیمتی دھاتوں کی قیمتوں میں اضافہ ہو رہا ہے۔