فوکس کان نے ملازموں کے بونس میں کیا چار گنا اضافہ

بیجنگ: تائیوان کی ملٹی نیشنل الیکٹرانکس کمپنی اور ایپل فراہم کرنے والی کمپنی فوکس کان نے کہا ہے کہ اس نے چین میں آئی فون کے ایک بڑے پلانٹ میں کام کرنے والے کارکنوں کے یومیہ بونس کو چار گنا بڑھا دیا ہے۔ کمپنی کا کہنا ہے کہ اس نے یہ فیصلہ کورونا وبا کے دوران ورکرز کے کام چھوڑنے کے پیش نظر کیا ہے۔

بی بی سی کی ایک رپورٹ کے مطابق کمپنی کا کہنا ہے کہ وسطی چین میں زینگ زو میں اس کے مینوفیکچرنگ پلانٹ میں اسمبلی لائن ورکرز کے لیے بونس کو یومیہ 400 یوآن (54.90 ڈالر) تک بڑھا دیا جائے گا۔ ہفتے کے آخر میں سوشل میڈیا پر وائرل ہونے والی ایک ویڈیو میں کارکنوں کو پلانٹ کی دیوار سے چھلانگ لگاتے دکھایا گیا تھا۔ واضح رہے کہ چینی عوام اور کاروبار صدر شی جن پنگ کی سخت صفرکووڈ پالیسی سے نبردآزما ہیں۔

بی بی سی کی ایک رپورٹ کے مطابق فاکس کان نے وی چیٹ سوشل میڈیا پلیٹ فارم پر کہا ہے کہ جو لوگ دنیا کی سب سے بڑی آئی فون فیکٹری میں مہینے میں 25 دن سے زیادہ کام کرتے ہیں انہیں 1500 یوآن سے لے کر زیادہ سے زیادہ 5000 یوآن تک کا بونس دیا جائے گا۔ ساتھ ہی نومبر میں بغیر کسی چھٹی کے اپنی "بہترین کوشش" کرنے والوں کو مہینے کے لیے مجموعی طور پر 15,000 یوآن سے زیادہ کا بونس دیا جا سکتا ہے۔