شرح سود میں کمی، مودی حکومت کا پی ایف کھاتہ برداروں کو جھٹکا 

مرکز کی مودی حکومت نے پی ایف کھاتوں پر دئیے جانے والے سود کی شرح کو کم کرکے ملک بھر کے ملازمین کو جھٹکا دیا ہے۔ ایمپلائیز پرووڈنٹ فنڈ کی تنظیم (ای پی ایف او) کی طرف سے اب شرح سود 8.65 فیصد کی بجائے 8.55 فیصد ہی دی جائے گی۔ مالی سال13-2012 کے بعد سے یہ سب سے کم شرح سود ہے۔ اس سے قبل پی ایف کھاتوں پر مالی سال 17-2016 میں 8.65، سال 16-2015 میں 8.8 فیصد، 15-2014 اور 14-2013 میں 8.75 فیصد کی شرح سے سود ادا کیا جاتا تھا۔

واضح رہے کہ گزشتہ مالی سال میں ای پی ایف پر 8.55 فیصد کی شرح سے سود دینے کو منظوری دی تھی لیکن کرناٹک چناؤ کے دوران ضابطہ اخلاق نافذ ہونے کی وجہ سے اسے نافذ نہیں کیا جا سکا تھا۔ ای پی ایف او کے مرکزی بورڈ نے 21 فروری 2018 کو ہوئے اجلاس میں18-2017 کے لئے 8.55 فیصد کی شرح سے سود دینے کا فیصلہ کیا ہے۔