سی این جی کے داموں میں پھر اضافہ، جانیں دہلی-این سی آر میں کیا ہے نئی قیمت؟
دہلی میں اس بار سی این جی کی قیمت میں اضافہ کیا گیا ہے اور یہ نرخ ہفتہ کی صبح 6 بجے سے نافذ ہو گئے۔ جس کے بعد، دہلی میں سی این جی کی قیمت 95 پیسے بڑھ کر 79.56 روپے فی کلو ہو گئی ہے
![تصویر سوشل میڈیا](https://media.assettype.com/qaumiawaz%2F2022-12%2F966b97bf-9f1d-4b47-93ef-36d8e2ffa0bf%2Fcng.jpg?rect=0%2C0%2C750%2C422&auto=format%2Ccompress&fmt=webp)
نئی دہلی: سی این جی کی قیمتوں میں ایک بار پھر اضافہ کیا گیا ہے، جس سے عوام کو پھر مہنگائی کا جھٹکا لگا ہے۔ دہلی اور این سی آر میں سی این جی کی قیمتوں میں اضافہ ہوا ہے۔ یہ نرخ آج صبح 6 بجے سے نافذ ہو گئے ہیں۔ دہلی میں سی این جی کی قیمت 95 پیسے بڑھ کر 79.56 روپے فی کلو ہو گئی ہے۔
این سی آر میں بھی سی این جی کی قیمتوں میں اضافہ ہوا ہے۔ نوئیڈا، گریٹر نوئیڈا اور غازی آباد میں سی این جی 82.12 روپے فی کلو تک پہنچ گئی ہے۔ جبکہ گڑگاؤں میں اس کے دام 87.89 روپے فی کلو ہے۔ اس سے پہلے دہلی میں سی این جی کی قیمت میں 3 روپے فی کلو کا اضافہ کیا گیا تھا، جس کے بعد راجدھانی میں سی این جی کی قیمت 78.61 روپے فی کلوگرام ہو گئی تھی۔
اپریل 2021 سے اب تک سی این جی کی قیمت میں تقریباً 80 فیصد اضافہ ہوا ہے۔ رواں سال مارچ کے بعد یہ 15واں موقع ہے کہ سی این جی کی قیمت میں اضافہ کیا گیا ہے۔ 10 ماہ میں مجموعی طور پر سی این جی کی قیمت میں 23 روپے 55 پیسے فی کلو اضافہ ہوا ہے۔ گزشتہ سال اپریل میں سی این جی کی قیمت 36.16 روپے فی کلو تھی، جو اب دہلی میں 80 روپے کے قریب پہنچ گئی ہے۔
ظاہر ہے کہ سی این جی کی قیمتوں میں اضافے کا براہ راست اثر عوام پر پڑتا ہے۔ اس سے نہ صرف پرائیویٹ گاڑیوں کے ڈرائیور متاثر ہوتے ہیں بلکہ وہ لوگ بھی متاثر ہوتے ہیں جو آٹو اور کیب خدمات استعمال کرتے ہیں۔ سی این جی کی قیمتوں میں اضافے کے بعد اس کا اثر عوام کی جیب پر بھی پڑ سکتا ہے اور ٹیکسی یا آٹو کا کرایہ مہنگا ہو سکتا ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔