اڈانی گروپ کے حصص میں گراوٹ  جاری، نفٹی 650 پوائنٹس سے زیادہ ٹوٹا

نئی دہلی: اسٹاک مارکیٹ میں تجارت  آج انتہائی سست رہی، اگرچہ مارکیٹ کا آغاز معمولی گراوٹ سے ہوا، لیکن فوراً ہی مارکیٹ میں زبردست فروخت ہوئی۔ سینسیکس اور نفٹی کے انڈیکس آج سرخ نشان میں کھلے۔ ایشیائی بازاروں سے ملے جلے اشارے مل رہے ہیں تاہم روسی مارکیٹ میں زبردست تیزی دیکھی جا رہی ہے۔ یوم جمہوریہ کے موقع پر کل گھریلو اسٹاک بازار بند تھے لیکن آج بازار میں تجارت کے لیے اشارے بہت خراب ہیں۔ اڈانی گروپ کے حصص میں گراوٹ کی وجہ سے گھریلو اسٹاک مارکیٹیں گر رہی ہیں۔

سینسیکس 506 پوائنٹس یا 0.84 فیصد کی کمی کے ساتھ 59,698 پر آگیا ہے۔ نفٹی 128 پوائنٹس یا 0.72 فیصد کی کمی کے ساتھ 17,763.35 پر ٹریڈ کر رہا ہے۔

آج کے آغاز میں، این ایس ای کا نفٹی 14.75 پوائنٹس کی معمولی کمی کے ساتھ 17,877.20 پر کھلا۔ اس کے علاوہ بی ایس ای سینسیکس 38.16 پوائنٹس کی گراوٹ کے ساتھ 60,166.90 پر کھلا۔ اس طرح سینسیکس اور نفٹی میں تجارت سرخ نشان میں کھلی۔

نیوز پورٹل ’اے بی پی‘ پر شائع خبر کے مطابق اڈانی گروپ کے حصص آج بھی گراوٹ دیکھ رہے ہیں۔ اڈانی ولمار 5 فیصد کم ہو کر 516.85 روپے پر آ گیا ہے۔ اڈانی پورٹس میں تقریباً 3 فیصد کی کمی ہے اور یہ 691.90 روپے فی شیئر پر ہے۔ اڈانی پاور میں بھی 5 فیصد کی کمی ہوئی ہے اور اس کی قیمت 247 روپے فی شیئر پر آ گئی ہے۔ اڈانی انٹرپرائزز، جس کا ایف پی او آج آیا ہے، 2.27 فیصد گر کر 3311.90 روپے فی شیئر پر ہے۔ اڈانی ٹرانسمیشن کا حصص سب سے زیادہ 13.65 فیصد گرا ہے اور 2174 روپے پر آ گیا ہے۔ اس اسٹاک میں 343 روپے کی گراوٹ دیکھی جا رہی ہے۔ اڈانی گرین انرجی لمیٹڈ 10.07 فیصد گرنے کے بعد 187 روپے گرنے کے بعد 1670.65 روپے فی شیئر پر ٹریڈ کر رہا ہے۔

آج کی تجارت میں مارکیٹ پری اوپننگ ملا جلا رہی ہے۔ بی ایس ای کا سینسیکس 40.81 پوائنٹس کی گراوٹ کے ساتھ 60164.25 پر ٹریڈ کر رہا تھا۔ اس کے علاوہ، این ایس ای کا نفٹی 42.20 پوائنٹس یعنی 0.24 فیصد کے اضافے کے ساتھ 17934.15 کی سطح پر ٹریڈ کر رہا تھا۔

آج گرتے ہوئے سیکٹرز میں تیل اور گیس، کنزیومر ڈیوربلز، پی ایس یو بینک، میڈیا، میٹل، ایف ایم سی جی اور مالیاتی اسٹاک میں کمی دیکھی گئی۔ آٹو شیئرز آج زبردست تیزی پر ہیں اور ان میں 1.9 فیصد کا اضافہ ریکارڈ کیا جا رہا ہے۔

بدھ کو اسٹاک مارکیٹ میں زبردست گراوٹ دیکھی گئی تھی  اور سینسیکس 773 پوائنٹ یعنی 1.27 فیصد کی گراوٹ کے ساتھ 60205 کی سطح پر بند ہوا تھا۔