ہریانہ میں کرپٹو کرنسی کے نام پر 9 کروڑ 68 لاکھ روپے کی ٹھگی
ہریانہ کے پنچکولہ میں ایک شخص سے کرپٹو کرنسی میں کاروبار کے نام پر کروڑوں روپے ٹھگ لئے گئے۔ پنچکولہ سائبر تھانہ کے انچارج للیت کمار نے جمعہ کو اس کی اطلاع دی
![<div class="paragraphs"><p>سائبر تھانہ پچکولہ / آئی اے این ایس</p></div>](https://media.assettype.com/qaumiawaz%2F2024-07%2F59911588-441b-418c-8a9b-73e83c576d20%2Fpanchkula%20cyber.jpg?rect=19%2C0%2C754%2C424&auto=format%2Ccompress&fmt=webp)
سائبر تھانہ پچکولہ / آئی اے اینایس
پنچکولہ: ملک میں آن لائن ٹھگی کے معاملہ میں لگاتار اضافہ کے درمیان ہریانہ کے پنچکولہ میں ایک شخص سے کرپٹو کرنسی میں کاروبار کے نام پر کروڑوں روپے ٹھگ لئے گئے۔ پنچکولہ سائبر تھانہ کے انچارج للیت کمار نے جمعہ کو اس کی اطلاع دی۔
انہوں نے بتایا کہ آن لائن سائبر پورٹل پر للیت سنگل نام کے شخص کی جانب سے شکایت ارسال کی گئی کہ 13 دسمبر 2023 کو انہیں ایک لنک بھجا گیا، جس میں کاروبار کی اطلاع حاصل کرنے کے لئے کلک کرنے کو کہا گیا۔
للیت سے راہل شرما نامی شخص نے رابطہ قائم کیا اور کرپٹو کرنسی میں سرمایہ کاری کرنے کے لیے مائل کیا۔ وہ راہل شرما کے واٹس ایپ گروپ میں شامل ہو گیا اور سرمایہ کاری شروع کر دی۔ تین مہینے بعد اس نے گروپ میں کاروبار کے سلسلے میں معلومات طلب کی۔
متاثرہ شخص نے راہل شرما کے کہنے پر بیرونی سرمایہ کار سے گفتگو کی اور سرمایہ کاری پر راضی ہو گیا۔ اس کے بعد متاثرہ للیت سے کے وائی سی کے لئے تمام دستاویزات طلب کئے گئے اور ٹریڈنگ کے لئے کھاتہ بھی کھلوایا گیا۔ اس نے 18 مختلف قسطوں میں مجموعی طور پر 9 کروڑ 68 لاکھ روپے کی سرمایہ کاری کی۔
پھر جولائی کے پہلے ہفتے میں متاثرہ للیت نے سرمایہ کاری کی پوری رقم واپس لینے کو کہا۔ اس پر ملزمان نے ان سے کہا کہ وہ اس کے لیے کل رقم کا 10 فیصد بطور ٹیکس جمع کرائیں۔ اس طرح للیت سنگل کے ساتھ کروڑوں روپے کا فراڈ کیا گیا۔
تفتیشی افسر نے بتایا کہ متاثرہ کی شکایت پر مقدمہ درج کیا گیا ہے۔ اس کے علاوہ جن بینک کھاتوں میں رقم منتقل کی گئی ہے ان کی بھی چھان بین کی جا رہی ہے۔ بینک اکاؤنٹ سے بھی دو کروڑ روپے نکلے ہیں۔ کیس کی مکمل تفتیش کے بعد تمام ملزمان کو جلد گرفتار کر لیا جائے گا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔