سپریم کورٹ نے ایکتا کپور کو لگائی پھٹکار کہا- ’ملک کی نوجوان نسل کے ذہنوں کو خراب کر رہی ہیں‘

نئی دہلی: سپریم کورٹ نے جمعہ کے روز ویب سیریز ’ٹرپل ایکس‘ میں ’قابل اعتراض مناظر‘ کے حوالہ سے پروڈیوسر ایکتا کپور کو پھٹکار لگائی اور کہا کہ وہ اس ملک کی نوجوان نسل کے ذہنوں کو خراب کر رہی ہیں۔ سپریم کورٹ کی جانب سے ایکتا کپور کی اس عرضی پر سماعت کی جا رہی تھی جس میں ان کی بنائی گئی ویب سیریز ’ٹریپل ایکس‘ میں مبینہ طور پر فوجیوں کی توہین کرنے کے معاملہ میں ان کے خلاف جاری وارنٹ گرفتاری کو چیلنج کیا گیا ہے۔ خیال رہے کہ ’ٹریپل ایکس‘ کو ایکتا کپور کے او ٹی ٹی (اوور دی ٹاپ) پلیٹ فارم 'آلٹ بالاجی' پر دستیاب ہے۔

جسٹس اجے رستوگی اور جسٹس سی ٹی روی کمار کی بنچ نے کہا، ’’کچھ تو کیا جانا چاہئے۔ آپ اس ملک کی نوجوان نسل کا دماغ خراب کر رہی ہیں۔ او ٹی ٹی مواد سب کے لیے دستیاب ہے۔ آپ لوگوں کے سامنے کس قسم چیزیں پیش کر رہی ہیں؟‘‘ ایکتا کپور کی طرف سے پیش ہونے والے سینئر وکیل مکل روہتگی نے کہا کہ پٹنہ ہائی کورٹ میں عرضی داخل کی گئی ہے لیکن اس معاملے کی جلد سماعت ہونے کی امید نہیں ہے۔ انہوں نے کہا کہ سپریم کورٹ نے پہلے بھی اسی طرح کے ایک کیس میں کپور کو تحفظ دیا تھا۔

عدالت نے ’’ہر بار جب بھی آپ اس عدالت میں آئیں گے، آپ کی ستائش نہیں کی جائے گی۔ ایسی عرضی دائر کرنے پر ہم آپ کو جرمانہ عائد کریں گے۔ روہتگی براہ کرم اسے اپنے مؤکل تک یہ پہنچائیں۔ کہ صرف اس لیے کہ آپ ایک بہترین وکیل کی خدمات حاصل کر لیتی ہیں، یہ عدالت آپ جیسوں کے لئے نہیں ہے جن کے پاس آواز ہے۔ بلکہ یہ عدالت ان لوگوں کے کے لیے کام کرتی ہے جن کے پاس آواز نہیں ہے۔‘‘

سپریم کورٹ نے اس معاملے کو زیر التواء رکھا اور تجویز دی کہ ہائی کورٹ میں سماعت کی صورتحال کے بارے میں جاننے کے لیے کسی مقامی وکیل کی خدمات حاصل کی جا سکتی ہیں۔

خیال رہے کہ بہار کے بیگوسرائے کی ایک عدالت نے سابق فوجی شمبھو کمار کی عرضی پر ایکتا کپور کے خلاف وارنٹ گرفتاری جاری کیا تھا۔ کمار نے اپنی 2020 کی شکایت میں الزام عائد کیا کہ ویب سیریز ٹریپل ایکس کے دوسرے سیزن میں میں ایک فوجی کی بیوی کے حوالہ سے کئی قابل اعتراض مناظر پیش کئے گئے ہیں۔