سپر اسٹار سلمان خان کے قتل کا منصوبہ ناکام! 4 ملزمان گرفتار

ممبئی: پولیس نے سپر اسٹار سلمان خان کو قتل کرنے کا ایک اور منصوبہ ناکام بنا دیا ہے۔ نوی ممبئی کی پنویل پولیس نے اس معاملے میں چار لوگوں کو گرفتار کیا ہے۔ پولیس کا دعویٰ ہے کہ یہ لوگ لارنس بشنوئی گینگ سے تھے اور انہوں نے پنویل میں سلمان خان کی گاڑی پر حملہ کرنے کا منصوبہ بنایا تھا۔ رپورٹ میں ذرائع کے حوالہ سے کہا گیا ہے کہ اس کے لیے پاکستان کے ایک اسلحہ سپلائر سے اسلحہ منگوانے کا منصوبہ تھا۔ نئی ممبئی پولیس نے اس معاملے میں ایف آئی آر درج کر کے انہیں گرفتار کر لیا ہے۔

پولیس ذرائع کے مطابق پولیس کو اطلاع ملی تھی کہ جیل میں بند گینگسٹر لارنس بشنوئی نے کینیڈا میں مقیم اپنے کزن انمول بشنوئی اور ساتھی گولڈی برار کے ساتھ مل کر پاکستان کے ایک اسلحہ ڈیلر سے اے کے-47، ایم-16 اور اے کے-92 اور دیگر جدید ترین ہتھیار خرید کر اداکار سلمان خان کو قتل کرنے کی سازش رچی گئی ہے۔

معلومات کے مطابق گرفتار مجرموں اور گینگ نے جو منصوبہ تیار کیا تھا، اس میں ان کا مقصد سلمان خان کی گاڑی کو روکنا یا فارم ہاؤس پر حملہ کرنا تھا۔ ذرائع نے یہ بھی بتایا کہ لارنس بشنوئی گینگ نے اداکار سلمان خان کے گھر کے باہر فائرنگ کرنے والے دو شوٹروں کی گرفتاری سے ایک ماہ قبل یہ منصوبہ بنایا تھا۔

نوی ممبئی پولیس کا کہنا ہے کہ خفیہ اطلاع پر کارروائی کرتے ہوئے پولیس اب تک 4 افراد کو گرفتار کر چکی ہے اور اداکار سلمان خان پر حملے کے منصوبے کی تحقیقات کر رہی ہے۔ گرفتار مجرموں کی شناخت دھننجے سنگھ، گورو بھاٹیہ، وصفی خان اور ذیشان خان کے طور پر کی گئی ہے۔

اس معاملے میں پولیس میں آئی پی سی کی دفعہ 115، 120 (بی) اور 506 (2) کے تحت ایف آئی آر درج کی گئی ہے۔ اس ایف آئی آر میں پولیس نے لارنس بشنوئی، انمول بشنوئی، سمپت نہرا، گولڈی برار، اجے کشیپ عرف دھننجے تاپے سنگھ، راکی ​​شوٹر، ستیش کمار، سکھا شوٹر، سندیپ بشنوئی عرف گورو بھاٹیہ، روہت گودھرا، وسیم چینا، ڈوگر، سنتو کمار، وشال کمار، سندیپ سنگھ، ریاض عرف چندو، کملیش شاہ اور دیگر کو ملزم بنایا گیا ہے۔