’فیک کاسٹنگ‘ معاملے پر سلمان خان ایکشن میں، قانونی کارروائی کی دھمکی دی

 ممبئی: بال ووڈ کے دبنگ بھائی جان کہے جانے والے سلمان خان کے نام سے فلموں کے لیے فرضی کاسٹنگ کا معاملہ سامنے آیا ہے۔ ان کی فلموں کے لیے کچھ لوگوں سے رابطہ کیا گیا جس پر بھائی جان نے سخت ایکشن لیا ہے۔ بھائی جان کی فلم کمپنی ’سلمان خان فلم‘ (ایس کے ایف) نے ایک بیان جاری کرتے ہوئے نہ صرف اس کی وضاحت کی ہے بلکہ فرضی کاسٹنگ میں ملوث لوگوں کے خلاف سخت قانونی کارروائی کی دھمکی بھی دی ہے۔

انسٹاگرام پر ایک بیان شیئر کرتے ہوئے کمپنی نے بتایا ہے کہ موجودہ وقت میں کمپنی کسی بھی فلم کے لیے کاسٹنگ نہیں کر رہی ہے۔ اس نوٹ میں کہا گیا ہے کہ ’’ہم یہ صاف کر دینا چاہتے ہیں کہ نہ تو سلمان خان اور نہ ہی سلمان خان فلم کسی بھی فلم کے لیے کاسٹنگ کر رہی  ہے۔ ہم نے اپنے کسی بھی فیوچر پروجیکٹ کے لیے کسی طرح کے کاسٹنگ ایجنٹ کو کام پر نہیں رکھا ہے۔ اگر آپ کو اس ضمن میں کوئی بھی ای میل یا پھر میسیج ملتا ہے تو برائے مہربانی اس پر بھروسہ نہ کریں۔ اگر کوئی مسٹر خان اور ایس کے ایف کا نام غلط طریقے سے استعمال کرتے ہوئے پایا جائے گا تو اس کے خلاف ہم قانونی کارروائی کریں گے۔‘‘

واضح رہے کہ سلمان خان کی کمپنی نے گزشتہ سال بھی فیک کاسٹنگ کے بارے میں ایک بیان جاری کیا تھا۔ اس وقت بھی کمپنی اور سلمان خان کے نام کا استعمال کرتے ہوئے فیک کاسٹنگ کال کا معاملہ سامنے آیا تھا۔ گزشتہ کل (31 جنوری) کا یہ معاملہ بھی اسی نوعیت کا ہے جس کے بارے میں بھائی جان کی کمپنی نے سخت موقف اختیار کیا ہے۔ سلمان خان نے اس کمپنی کی شروعات 2011 میں کی تھی، اس میں ان کی والدہ سلمیٰ خان بھی شامل ہیں۔ بتایا جاتا ہے کہ اس کمپنی سے ہونے والی آمدنی ’بینگ ہیومن‘ آرگنائزیشن کو وقف کر دی جاتی ہے۔

سلمان خان پروڈکشن کے بینر تلے بنی پہلی فلم ’چلّر پارٹی‘ تھی جس کی ہدایت کاری نتیش تیواری اور وکاس بہل نے کی تھی۔ اس کے بعد ایس کے ایف نے ’بجرنگی بھائی جان‘، ‘ہیرو‘، ’ٹیوب لائٹ‘ اور ’رادھے‘ سمیت کئی فلمیں بنائی۔ فی الوقت سلمان خان وشنو وردھن کی ہدایت کاری میں بن رہی اپنی اگلی فلم ’دی بل‘ پر کام کر رہے ہیں۔ اس فلم کے پروڈیوسر کرن جوہر ہیں۔ اس کے ذریعے سلمان خان اور کرن جوہر 25 سال بعد ایک ساتھ  کام کر رہے ہیں۔ دونوں نے آخری بار 1998 میں ریلیز  ہوئی فلم ’کچھ کچھ ہوتا ہے‘ میں ایک ساتھ کام کیا تھا۔