سائرہ بانو کو 58ویں شادی کی سالگرہ پر آئی دلیپ کمار کی یاد، شیئر کیا دلچسپ واقعہ

مشہور اداکارہ سائرہ بانو نے اپنی اور دلیپ کمار کی شادی کی 58ویں سالگرہ کے موقع پر ایک جذباتی پوسٹ شیئر کی جس میں انہوں نے ماضی کی حسین یادوں کو تازہ کیا۔ انسٹاگرام پر شیئر کی گئی اس پوسٹ میں سائرہ بانو نے دل کو چھونے والے واقعات بیان کیے جو ان کی شادی سے متعلق تھے۔

خیال رہے کہ سائرہ بانو جب سے سوشل میڈیا پر آئی ہیں، وہ اپنی زندگی اور دلیپ کمار کے ساتھ گزرے لمحوں کی کہانیاں مداحوں کے ساتھ شیئر کرتی رہتی ہیں، اور یہ پوسٹ بھی اسی سلسلے کی ایک کڑی تھی۔

سائرہ بانو نے اپنی شادی کی سالگرہ کے حوالے سے شیئر کیے گئے طویل نوٹ میں اپنی اور دلیپ کمار کی محبت بھری یادوں کا ذکر کیا۔ انہوں نے بتایا کہ 58 سال پہلے کی ان کی شادی میں سب کچھ بہت جلدی میں ہوا تھا۔ ان کے پاس شادی کی تیاریوں کے لیے زیادہ وقت نہیں تھا، جس کی وجہ سے ان کا شادی کا جوڑا ایک مقامی درزی سے سلایا گیا اور یہاں تک کہ شادی کے دعوت نامے بھی نہیں چھپ سکے۔

سائرہ بانو نے بتایا کہ ان کی شادی اصل میں نومبر میں ہونی تھی، لیکن کچھ وجوہات کی بنا پر اسے جلدی کرنا پڑا۔ دلیپ کمار نے کلکتہ سے سائرہ بانو کی والدہ نسیم بانو کو فون کیا اور کہا کہ فوری طور پر ایک مولوی کو بلا کر نکاح پڑھوایا جائے۔ اس جلد بازی میں شادی کے بہت سے معاملات غیر معمولی تھے، لیکن پھر بھی یہ دن بہت یادگار تھا۔

انہوں نے ایک دلچسپ واقعہ بیان کیا کہ جب دلیپ کمار کی بارات ان کے بنگلے پر پہنچی تو ان کی گھوڑی ڈھلان سے اتر رہی تھی اور اس پر لگایا گیا چھاتا دلیپ کمار کے سہرے سے ٹکرا رہا تھا۔ اس دوران ان کے مداحوں کی بھی ایک بڑی تعداد بارات دیکھنے کے لیے جمع ہو گئی تھی اور کچھ تو سائرہ بانو کے گھر میں داخل بھی ہو گئے تھے تاکہ اپنے پسندیدہ اداکار کی شادی دیکھ سکیں۔

سائرہ بانو نے مزید بتایا کہ اتنے زیادہ لوگوں کی موجودگی میں نکاح کی رسومات ادا کرنے کے لیے انہیں اوپری منزل سے نیچے آنے میں دو گھنٹے لگ گئے۔ اس کے بعد ایک اور غیر معمولی واقعہ پیش آیا اور وہ یہ تھا کہ شادی کے لیے تیار کیا گیا کھانا کم پڑ گیا۔ سائرہ بانو نے ہنستے ہوئے کہا کہ "سوچیں، سب سے عظیم اداکاروں میں سے ایک کی شادی میں کھانا کم پڑ گیا تھا!" اس کے علاوہ، مداحوں نے شادی کی یادگار چیزیں بھی جمع کرنا شروع کر دیں، جیسے چمچ، کانٹے وغیرہ، جو بھی انہیں مل سکا۔