سلمان خان کے قتل کی سازش ناکام! پانی پت سے ’سکھا‘ نامی مشتبہ شخص گرفتار

ممبئی پولیس نے بالی ووڈ کے سپر اسٹار سلمان خان کے قتل کی سازش بے نقاب کرتے ہوئے ایک ملزم کو پانی پت، ہریانہ سے گرفتار کر لیا ہے۔ پولیس کے مطابق، گرفتار ملزم کا نام سکھا ہے، جسے بدھ کے روز پانی پت سے حراست میں لیا گیا اور نوی ممبئی منتقل کیا گیا۔ سکھا کو جمعرات کے روز عدالت میں پیش کیا جائے گا۔

یہ سازش بظاہر سیاسی رہنما بابا صدیقی کے قتل کے بعد سامنے آئی ہے، جنہیں حال ہی میں ممبئی میں گولی مار کر قتل کر دیا گیا تھا۔ اس حملے کی ذمہ داری بدنام زمانہ لارنس بشنوئی گینگ نے قبول کی تھی۔ بابا صدیقی کے قتل کے بعد سلمان خان کی سیکورٹی میں اضافہ کر دیا گیا ہے۔

پولیس نے جون میں انکشاف کیا تھا کہ سلمان خان کو ان کے نوی ممبئی فارم ہاؤس جاتے وقت نشانہ بنایا جا سکتا ہے۔ اس سے قبل، اپریل میں بھی سلمان کے گھر کے باہر نامعلوم افراد کی جانب سے فائرنگ کا واقعہ پیش آیا تھا۔

سلمان خان نے اپنے بیان میں شک ظاہر کیا تھا کہ ان پر اور ان کے خاندان کے افراد پر حملے کا منصوبہ لارنس بشنوئی گینگ نے بنایا ہے۔ ان کا بیان اس چارج شیٹ کا حصہ ہے جو پولیس نے فائل کی ہے۔

پولیس نے مزید کہا کہ سلمان کی نقل و حرکت پر نظر رکھنے کے لیے بشنوئی اور سمپت نہرا گینگز نے باندرہ والے گھر، پنويل فارم ہاؤس اور شوٹنگ کی لوکیشن پر تقریباً 60-70 افراد کو تعینات کر رکھا تھا۔ اس سازش کے انکشاف کے بعد 24 اگست کو پنويل ٹاؤن پولیس اسٹیشن میں کئی افراد کے خلاف مقدمہ درج کیا گیا تھا۔

سلمان خان کو ملنے والی دھمکیوں اور ان کی سیکورٹی سے متعلق سلمان کے بھائی، ارباز خان نے حال ہی میں ایک انٹرویو میں کہا کہ ’’یہ ایسا وقت ہے جب آپ کو اندازہ ہوتا ہے کہ کون آپ کے ساتھ کھڑا ہے۔ اس سے آپ کے ارد گرد ہو رہی بہت سی چیزوں کا حقیقی جائزہ فراہم کرتا ہے۔‘‘