معروف اداکار نصیرالدین شاہ نمونیا کی تشخیص کے بعد ہندوجا اسپتال میں داخل

مشہور و معروف فلم اداکار نصیرالدین شاہ کی طبیعت خراب ہو گئی ہے اور انھیں ممبئی کے کھار واقع ہندوجا اسپتال میں بغرض علاج داخل کرایا گیا ہے۔ 70 سالہ اداکار میں مبینہ طور پر نمونیا کی تشخیص کی گئی ہے اور اس کے بعد ان کے پھیپھڑوں میں ایک پیچ کا پتہ چلا ہے۔ گزشتہ کچھ دنوں سے ان کا علاج چل رہا ہے۔

نصیرالدین شاہ کے منیجر نے بامبے ٹائمز کو بتایا کہ وہ دو دنوں سے اسپتال میں داخل ہیں اور معالجین کی نگرانی میں ہیں۔ انھیں نمونیا کے سبب اسپتال لایا گیا تھا۔ اس کے بعد پھیپھڑوں میں ایک پیچ کی تشخیص ہوئی جس کے پیش نظر انھیں فوراً اسپتال میں داخل کرایا گیا۔

ورک فرنٹ کی بات کریں تو نصیرالدین شاہ آنے والی فلم ’میرِچ‘ میں دکھائی دیں گے۔ نئے ہدایت کار دھرو لاٹھور اس فلم کی ہدایت کاری کر رہے ہیں۔ فلم میں تشار کپور، انیتا ہسنندانی، راہل دیو اور جنوبی اداکارہ سیرت کپور بھی ہیں۔