مجھ سے بھی کی گئی تھی ریپ کی کوشش: عالیہ بھٹ کی ماں

ممبئی: بالی ووڈ کی دنیا میں ان دنوں ’می ٹو مہم‘ زور شور سے جاری ہے۔ فلمی ہستیاں یکے بعد دیگرے اپنے ساتھ ہوئی جنسی زیادتی کے واقعہ کو بیان کر رہے ہیں۔ عالیہ بھٹ کی ماں سونی رازدان نے بھی ایسا ہی سنسنی خیز انکشاف کیا ہے۔ سونی رازدان نے ایک انٹرویو میں بتایا کہ ان کے ساتھ بھی ایک مرتبہ ریپ کرنے کی کوشش کی گئی تھی۔

’دی کوئنٹ‘ کو دیئے گئے انٹرویو میں سونی نے کہا کہ وہ خوش قصمت ہیں کہ انہیں کام مانگنے کے لئے کبھی جنسی ہراسانی کا سامنا نہیں کرنا پڑا۔ حالانکہ انہوں نے بتایا کہ ایک مرتبہ جب وہ فلم کی شوٹنگ پر تھیں تو ان کے ساتھ ریپ کرنے کی کوشش کی گئی۔ سونی نے کہا کہ ریپ کرنے والا اپنے ارادوں میں کامیاب نہیں ہو سکا تھا۔

اس سے قبل وہ ایک تقریب کے دوران یہ کہہ چکی ہیں، ’’خواتین اپنی اسٹوری اشتراک نہیں کر رہیں تو برائے کرم ان کے تئیں اپنے دل میں کوئی خیالات پیدا نہ کریں۔‘‘ رپورٹ میں انہوں نے یہ بھی بتایا تھا کہ انہوں نے اس واقعہ کی شکایت کبھی کیوں نہیں کی۔

سونی نے بتایا کہ وہ اس واقعہ پر اس لئے خاموش رہیں کیوںکہ وہ نہیں چاہتی تھیں کہ اس کے خاندان کو اس کی اس حرکت کا پتہ چلے اور وہ کسی تکلیف سے گزریں۔ انہوں نے کہا کہ وہ صرف اس لئے خاموش رہیں کہ اگر شکایت کرتیں تو وہ انسان مشکل میں آجاتا کیوںکہ اس کے خاندان میں بیوی اور چھوٹے بچے بھی تھے۔

سونی نے بتایا کہ اس واقعہ کے بعد وہ ایسے رہیں جیسے کچھ ہوا ہی نہ ہو اور صورت حال کو سنبھالنے کی انہوں نے پوری کوشش کی۔ وہ خاموش رہیں، شرم کی وجہ سے نہیں بلکہ اس وجہ سے کہ کہیں ان کی وجہ سے اس خاندان کو درد نہ ملے جو ان کے کافی نزدیک تھا۔