اداکار منوج باجپئی کی والدہ کا 80 سال کی عمر میں انتقال، کافی وقت سے تھیں بیمار

نئی دہلی: بالی ووڈ کے باصلاحیت اداکاروں میں سے ایک منوج باجپئی کی والدہ گیتا دیوی آج انتقال کر گئیں۔ گیتا دیوی نے طویل علالت کے بعد جمعرات کی صبح 8.30 بجے یعنی آج صبح دہلی کے ایک اسپتال میں آخری سانس لی۔ ان کی عمر 80 سال تھی۔

معلومات کے مطابق منوج باجپئی کی والدہ گیتا دیوی بیماری کی وجہ سے گزشتہ کچھ دنوں سے دہلی کے اسپتالوں میں زیر علاج تھیں۔ گزشتہ ایک ہفتے سے گیتا دیوی کا علاج دہلی کے پشپانجلی میڈیکل سینٹر اور میکس سپر اسپیشلٹی اسپتال میں کیا جا رہا تھا۔ وہیں اپنے مصروف شیڈول سے وقت نکالتے ہوئے منوج باجپئی بھی اپنی والدہ سے ملنے اسپتال پہنچے تھے۔

منوج باجپئی کا پورا خاندان اپنی ماں کی موت سے صدمے میں ہے۔ منوج بھی اپنی ماں کے انتقال سے ٹوٹ گئے ہیں اور غم کی اس گھڑی میں خاندان کو سنبھال رہے ہیں۔ اشوک پنڈت نے ایک ٹوئٹ کے ذریعے منوج کی والدہ کے انتقال کی اطلاع دی ہے۔ انہوں نے اپنے ٹوئٹ میں لکھا، ’’منوج باجپئی آپ کی محترمہ والدہ کے انتقال پر آپ اور آپ کے پورے خاندان کے ساتھ ہماری دلی تعزیت۔‘‘